پاکستانی دفتر خارجہ کے مطابق اجلاس 15 اور 16 نومبر کو منعقد ہو رہا ہے، جس کا مقصد خطے کے ممالک کے ساتھ روابط بہتر بنانا اور تجارتی تعلقات کو وسعت دینا ہے۔
ای سی او وزرائے خارجہ کونسل کا 30واں اجلاس پاکستان کے نائب وزیراعظم اور وزیر خارجہ اسحاق ڈار کی زیر صدارت ہو رہا ہے۔ اس میں رکن ممالک کے وزرائے خارجہ، وفود کے سربراہان، ای سی او سیکریٹریٹ اور اس کے ذیلی اداروں کے نمائندے شریک ہیں۔
دفتر خارجہ کے مطابق پاکستان کی صدارت میں ہونے والے اس اجلاس میں علاقائی روابط مضبوط بنانے، رکن ممالک کے درمیان اقتصادی انضمام بڑھانے، شراکت داری کو وسعت دینے اور مشترکہ خوشحالی کے لیے اجتماعی کوششوں پر بات ہوگی۔
بیان میں کہا گیا ہے کہ یہ اجلاس ای سی او کو علاقائی تعاون، مکالمے اور اقتصادی شراکت داری کے ایک مؤثر پلیٹ فارم کے طور پر دوبارہ فعال کرنے کا موقع فراہم کرے گا۔
ای سی او کی بنیاد ایران، ترکیہ اور پاکستان نے 1964 میں علاقائی تعاون برائے ترقی (آر سی ڈی) کے نام سے رکھی تھی۔ 1985 میں اس کا نام تبدیل کرکے اقتصادی تعاون تنظیم رکھ دیا گیا، جبکہ 1990 کی دہائی میں افغانستان، آذربائیجان، قازقستان، کرغزستان، تاجکستان، ترکمانستان اور ازبکستان کو بھی اس میں شامل کیا گیا۔
تنظیم کا بنیادی مقصد خطے میں پائیدار اقتصادی ترقی کے لیے سازگار ماحول پیدا کرنا اور رکن ممالک کی مشترکہ خوشحالی اور فلاح و بہبود کو فروغ دینا ہے۔
دفتر خارجہ کے مطابق ای سی او کی صدارت پاکستان کو علاقائی رابطوں کے مرکز، رسد اور نقل و حمل کے نظام میں سہولت کار اور تجارت کے شعبے میں اہم کردار ادا کرنے کا موقع فراہم کرتی ہے۔
پاکستان اپنی جغرافیائی اہمیت کو بروئے کار لاتے ہوئے خود کو تجارت اور ٹرانزٹ کے ایک اہم علاقائی مرکز کے طور پر مستحکم کرنا چاہتا ہے۔ اس حکمت عملی میں وسطی ایشیا کے خشکی میں گھرے ممالک کو عالمی منڈیوں تک رسائی فراہم کرنا بھی شامل ہے۔
اس مقصد کے لیے 2024 میں پاکستان اور وسطی ایشیائی ممالک سمیت خلیجی ریاستوں کے درمیان اعلیٰ سطح کے دوروں، سرمایہ کاری سے متعلق مذاکرات اور اقتصادی سرگرمیوں میں اضافہ ہوا تھا۔
یہ اجلاس ایسے وقت میں ہو رہا ہے جب پاکستان دوطرفہ اور کثیرالجہتی قرض دہندگان پر انحصار کم کرکے علاقائی ممالک کے ساتھ تجارت، سرمایہ کاری اور رابطوں کے شعبوں میں شراکت داریوں کو فروغ دینے کی کوشش کر رہا ہے۔
