مولانا حاجی نذرالرحمان کو نومبر 2018 میں تبلیغی جماعت کا امیر مقرر کیا گیا تھا۔ وہ جماعت کے چوتھے امیر تھے اور ان سے قبل حاجی محمد عبدالوہاب اس منصب پر فائز تھے۔ حاجی عبدالوہاب کے انتقال کے بعد جماعت کے اکابرین نے باہمی مشاورت سے مولانا نذرالرحمان کو قیادت کی ذمہ داری سونپی تھی۔ ان کی نمازِ جنازہ بھی مولانا نذرالرحمان نے پڑھائی تھی۔ مرحوم کی نمازِ جنازہ کے وقت اور مقام سے متعلق حتمی اعلان بعد میں کیے جانے کا بتایا گیا ہے۔
مولانا نذرالرحمان کی زندگی کا آغاز ایک عام دینی ماحول میں ہوا۔ وہ 1929 میں ضلع راولپنڈی کے گاؤں بلالوال میں پیدا ہوئے۔ انہوں نے ابتدائی دینی تعلیم مولانا عبدالخالق سے حاصل کی، بعد ازاں مفتی عبدالحئی قریشی اور دارالعلوم ربانیہ میں تعلیم حاصل کی۔ انہوں نے مولانا فریدالدین قریشی سے بھی دینی علوم کی کتابیں پڑھیں۔ 1949 اور 1950 کے دوران مدرسہ خادم علوم نبوت، کٹھیالہ شیخاں، ضلع گجرات میں دورۂ حدیث مکمل کیا، جہاں شیخ الحدیث مولانا سلطان محمود ان کے استاد تھے۔
دینی تعلیم مکمل کرنے کے بعد مولانا نذرالرحمان اپنے آبائی گاؤں بلالوال واپس آئے اور مقامی مسجد میں امامت کی ذمہ داری سنبھال لی۔ وہ 1950 سے 1955 تک اسی مسجد میں امامت اور دینی تعلیم و رہنمائی کے فرائض انجام دیتے رہے۔ بعد ازاں بوی گڑھ، ٹیکسلا اور راولپنڈی کے مختلف علاقوں میں بھی دینی خدمات سرانجام دیں۔ راولپنڈی کے علاقے ڈھوک حسو میں ڈی ایم ٹیکسٹائل ملز کی مسجد سے وابستہ رہے، جبکہ زکریا مسجد راولپنڈی میں تقریباً دس برس تک تدریس، امامت اور دعوت و تبلیغ کے کام میں مصروف رہے۔
ایک مقامی مسجد سے شروع ہونے والا ان کا دینی سفر وقت کے ساتھ وسیع ہوتا چلا گیا۔ مولانا نذرالرحمان نے اپنی زندگی کا بڑا حصہ دعوت و تبلیغ کی سرگرمیوں میں گزارا۔ انہیں پاکستان میں تبلیغی جماعت کے ابتدائی کارکنوں میں شمار کیا جاتا تھا اور بعض روایات کے مطابق وہ ملک میں جماعت کے ابتدائی بیس کارکنوں میں شامل تھے۔ مختلف علاقوں میں دعوتی سرگرمیوں میں حصہ لیتے ہوئے وہ جماعت کے سینئر رہنماؤں میں شامل ہوگئے۔ رائیونڈ کے عالمی تبلیغی مرکز سے ان کی وابستگی مضبوط ہوئی اور انہیں جماعت کی اہم ذمہ داریاں سونپی گئیں۔ بعد ازاں وہ نائب امیر کے منصب پر بھی فائز رہے۔
نومبر 2018 میں حاجی محمد عبدالوہاب کے انتقال کے بعد تبلیغی جماعت کی قیادت کے لیے مشاورت کا مرحلہ شروع ہوا۔ دستیاب معلومات اور عالمی اشاعت ’دی مسلم 500‘ میں موجود تعارف کے مطابق حاجی عبدالوہاب نے اپنی زندگی میں جانشینی کے لیے تین نام تجویز کیے تھے، جن میں مولانا نذرالرحمان، مولانا احمد بٹلہ اور مولانا عبیداللہ خورشید شامل تھے۔ حاجی عبدالوہاب کے انتقال کے بعد جماعت کے اکابرین نے مشاورت کی اور مولانا نذرالرحمان کو پاکستان میں تبلیغی جماعت کا نیا امیر مقرر کردیا۔ اس طرح انہوں نے جماعت کے چوتھے امیر کی حیثیت سے ذمہ داریاں سنبھالیں۔
مولانا نذرالرحمان کو صرف پاکستان ہی نہیں بلکہ عالمی سطح پر بھی دینی حلقوں میں ایک نمایاں مقام حاصل تھا۔ ان کی عالمی شناخت کا ایک اہم حوالہ ’دی مسلم 500‘ کی فہرست ہے، جسے اردن کے رائل اسلامک اسٹریٹجک اسٹڈیز سینٹر کی جانب سے مرتب کیا جاتا ہے۔ اس فہرست میں دنیا بھر کی بااثر مسلم شخصیات، مذہبی رہنماؤں، علمائے کرام، سیاسی شخصیات اور مختلف شعبوں میں نمایاں اثر و رسوخ رکھنے والے افراد کو شامل کیا جاتا ہے۔
مولانا نذرالرحمان کا نام 2019 سے 2026 تک مسلسل آٹھ ایڈیشنز میں اس فہرست کا حصہ رہا، جبکہ 2020 سے 2026 تک وہ مسلسل دنیا کے 50 بااثر مسلمانوں میں بھی شامل رہے۔ ان کی مسلسل عالمی سطح پر موجودگی اس بات کی عکاسی کرتی تھی کہ دعوت و تبلیغ کے شعبے میں ان کی خدمات اور قیادت کو بین الاقوامی سطح پر بھی اہمیت حاصل تھی۔
مولانا نذرالرحمان کے انتقال پر وفاقی وزیر داخلہ محسن نقوی نے بھی گہرے رنج و غم کا اظہار کیا ہے۔ اپنے تعزیتی پیغام میں انہوں نے سوگوار خاندان اور تبلیغی جماعت کے اکابرین سے دلی ہمدردی اور تعزیت کا اظہار کرتے ہوئے کہا کہ مرحوم نے دینِ اسلام کی سربلندی اور تبلیغ کے لیے گراں قدر خدمات انجام دیں، جنہیں ہمیشہ یاد رکھا جائے گا۔
محسن نقوی نے دعا کی کہ اللہ تعالیٰ مولانا نذرالرحمان کی مغفرت فرمائے، ان کے درجات بلند کرے اور ان کی دینی خدمات کو اپنی بارگاہ میں قبول فرمائے۔ انہوں نے لواحقین اور جماعت سے وابستہ افراد کے لیے صبرِ جمیل کی دعا بھی کی۔
مولانا حاجی نذرالرحمان کا انتقال تبلیغی جماعت کے لیے ایک اہم نقصان قرار دیا جا رہا ہے۔ انہوں نے ایک مقامی مسجد میں امامت اور تدریس سے اپنی عملی زندگی کا آغاز کیا اور کئی دہائیوں کی دینی و دعوتی جدوجہد کے بعد جماعت کی مرکزی قیادت تک پہنچے۔ ان کی زندگی کا بڑا حصہ دین کی دعوت، لوگوں کی دینی رہنمائی اور تبلیغی سرگرمیوں کے فروغ میں گزرا۔
اللہ تعالیٰ مرحوم کی مغفرت فرمائے، ان کی دینی خدمات قبول فرمائے، درجات بلند کرے اور اہل خانہ، متعلقین اور تبلیغی جماعت سے وابستہ تمام افراد کو یہ صدمہ برداشت کرنے کی توفیق عطا فرمائے۔ آمین۔







