پاکستان نے انڈین وزیراعظم کے حالیہ بیان کو سختی سے مسترد کرتے ہوئے اسے غیر ذمے دارانہ، اشتعال انگیز اور خطے میں کشیدگی بڑھانے کی کوشش قرار دیا ہے۔
دفتر خارجہ کے ترجمان شفقت علی خان نے ہفتہ وار نیوز بریفنگ کے دوران کہا کہ پاکستان کو دہشتگردی سے جوڑنے کی انڈین کوششیں نہ صرف بے بنیاد ہیں بلکہ حقائق کے بھی منافی ہیں۔
ترجمان نے واضح کیا کہ پاکستان دہشتگردی کے خلاف عالمی جنگ میں ایک اہم شراکت دار رہا ہے اور اس کی قربانیوں کو عالمی سطح پر تسلیم کیا گیا ہے۔ انہوں نے عالمی برادری سے مطالبہ کیا کہ وہ انڈیا کے غیر ذمے دارانہ بیانات اور رویے کا نوٹس لے، جو خطے کے امن اور استحکام کے لیے خطرہ بن سکتے ہیں۔
یہ بھی پڑھیں: ’ایک قومی بحران‘، امریکا کے درآمدی ٹیکس جاپان کی گاڑیوں کی صنعت کے لیے خطرہ بن گئے
ترجمان کا کہنا تھا کہ پاکستان مسئلہ کشمیر کا حل کشمیری عوام کی امنگوں اور اقوام متحدہ کی سلامتی کونسل کی قراردادوں کے مطابق چاہتا ہے۔ انڈیا کی جانب سے جھوٹے الزامات اور عسکری دعوے اقوام متحدہ کے چارٹر اور عالمی قوانین کی کھلی خلاف ورزی ہیں۔
ترجمان نے نائب وزیراعظم اسحاق ڈار کے حالیہ دورہ چین کا بھی ذکر کیا اور کہا کہ پاکستان علاقائی امن کا خواہاں ہے، تاہم ہماری امن کی خواہش کو ہرگز کمزوری نہ سمجھا جائے۔
ترجمان دفتر خارجہ نے کہا کہ پاکستان ذمہ دار ریاست کے طور پر خطے میں امن و استحکام کے لیے اپنا کردار ادا کرتا رہے گا، لیکن کسی بھی جارحیت کا منہ توڑ جواب دینے کی مکمل صلاحیت رکھتا ہے۔
