سابق امریکی صدر ڈونلڈ ٹرمپ نے ایران کو سخت خبردار کیا ہے کہ اگر ایران نے امریکا پر کسی بھی شکل میں حملہ کیا تو امریکی فوج پوری طاقت سے جواب دے گی۔
انہوں نے کہا کہ ایران پر ہونے والے حملے میں امریکا کا کوئی کردار نہیں تھا، لیکن اگر ایران نے کسی بھی طرح امریکا پر حملہ کیا تو ایسا جواب دیا جائے گا جو پہلے کبھی نہیں دیکھا گیا۔
مزید پڑھیں: دیرینہ دوست سے جانی دشمن تک کا سفر: ایران-اسرائیل تعلقات کا خونریز انجام یا نئے باب کی شروعات؟
ٹرمپ کا کہنا تھا کہ وہ ایران اور اسرائیل کے درمیان جاری تنازع ختم کروا سکتے ہیں اور ان کے درمیان معاہدہ ممکن ہے۔ انہوں نے اس بات پر زور دیا کہ امریکا چاہے تو دونوں ممالک کے درمیان امن قائم کیا جا سکتا ہے۔
ادھر اسرائیلی وزیراعظم نیتن یاہو نے ایک ویڈیو بیان میں کہا ہے کہ ایران کے خلاف اسرائیل کے حملوں کو امریکی صدر ڈونلڈ ٹرمپ کی مکمل حمایت حاصل رہی ہے۔
انہوں نے دعویٰ کیا کہ ایرانی حکام حملوں کے خدشے کے باعث اپنا سامان باندھ رہے ہیں۔
ایک اسرائیلی اخبار کے مطابق اسرائیل نے امریکا سے کہا تھا کہ وہ ایران پر حملے میں ساتھ دے لیکن امریکہ نے یہ درخواست مسترد کر دی۔
مشرق وسطیٰ میں صورتحال کشیدہ ہے اور یہ بیانات کشیدگی کو مزید بڑھا سکتے ہیں۔ امریکا اور ایران کے درمیان تلخیاں برقرار ہیں جبکہ اسرائیل بھی ایران کے خلاف مزید کارروائیوں کا عندیہ دے رہا ہے۔
