سابق امریکی صدر ڈونلڈ ٹرمپ کی انتظامیہ نے امریکا میں داخلے پر عائد سفری پابندیوں میں نمایاں توسیع پر غور شروع کر دیا ہے، جس کے تحت مزید 36 ممالک کے شہریوں پر پابندی عائد کی جا سکتی ہے
عالمی خبر رساں ادارے رائٹرز کے مطابق رواں ماہ کے شروع میں امریکی صدر ٹرمپ نے ایک اعلامیہ پر دستخط کیے جس کے تحت 12 ممالک کے شہریوں کے امریکا میں داخلے پر پابندی عائد کی گئی، جسے غیر ملکی دہشت گردوں اور دیگر قومی سلامتی کے خدشات سے تحفظ کا جواز بنا کر نافذ کیا گیا۔
یہ اقدام صدر ٹرمپ کی دوسری مدت کے آغاز پر شروع کی گئی امیگریشن سختی کا حصہ ہے اور امریکی جامعات میں بعض غیر ملکی طلبہ کے داخلے کو روکنے اور بعض کی ملک بدری کی کوششیں بھی کی گئی ہیں۔
محکمہ خارجہ کی جانب سے جاری کردہ ایک محکمانہ سفارتی مراسلہ، جس پر امریکی وزیر خارجہ مارکو روبیو کے دستخط ہیں، میں ان ممالک کے حوالے سے درجن بھر خدشات کا اظہار کیا گیا اور اُن سے اصلاحی اقدامات کا مطالبہ کیا گیا ہے۔
مراسلے میں کہا گیا ہے کہ محکمہ نے 36 ایسے ممالک کی نشاندہی کی ہے جن پر مکمل یا جزوی سفری پابندی کی سفارش کی جا سکتی ہے اگر وہ 60 دن کے اندر مقررہ معیارات اور تقاضے پورے نہ کریں۔
محکمہ خارجہ نے جن امور پر تشویش ظاہر کی، ان میں بعض ممالک کی حکومتوں کی ناقص کارکردگی یا تعاون کا فقدان، شناختی دستاویزات کی عدم صداقت اور پاسپورٹس کی سکیورٹی کے حوالے سے مسائل شامل ہیں۔
مزید یہ کہ کچھ ممالک اپنے شہریوں کی واپسی کے لیے امریکی حکام کے ساتھ تعاون نہیں کر رہے جو ملک بدری کے احکامات کے تحت امریکا سے نکالے جا رہے ہیں۔
مزید پڑھیں:ایران اور اسرائیل امن معاہدہ کریں گے اور میں اسے یقینی بناؤں گا، ڈونلڈ ٹرمپ
ممکنہ سفری پابندی کا سامنا کرنے والے 36 ممالک میں سے انگولا، اینٹیگوا و باربوڈا، بینن، بھوٹان، برکینا فاسو، کیپ وردے، کمبوڈیا، کیمرون، آئیوری کوسٹ (کوت دی وار)، جمہوریہ کانگو، جبوتی، ڈومینیکا، ایتھوپیا، مصر، گیبون، گیمبیا، گھانا، کرغزستان، لائبیریا، ملاوی، موریطانیہ، نائجر، نائجیریا، سینٹ کٹس و نیوس، سینٹ لوشیا، ساؤ ٹومے و پرنسپے، سینیگال، جنوبی سوڈان، شام، تنزانیہ، ٹونگا، تووالو، یوگنڈا، وانوآتو، زیمبیا، اور زمبابوے۔
یہ اقدام رواں ماہ کے آغاز میں نافذ ہونے والی پابندیوں کی نسبت ایک بڑی توسیع ہو گا، جن میں افغانستان، میانمار، چاڈ، کانگو ریپبلک، استوائی گنی، اریٹریا، ہیٹی، ایران، لیبیا، صومالیہ، سوڈان، اور یمن شامل تھے۔
