ایران اسرائیل کشیدگی کے دوران کئی متنازع خبریں سامنے آئی ہیں، جن میں سے ایک خبر نے خاصی توجہ حاصل کی۔ یہ دعویٰ کیا گیا کہ اگر اسرائیل ایران پر ایٹم بم گراتا ہے تو پاکستان، ایران کی حمایت میں، اسرائیل پر جوابی ایٹمی حملہ کرے گا۔
سوشل میڈیا پر اس خبر کو تیزی سے شیئر کیا گیا اور بعض حلقوں نے اسے پاکستان کی سرکاری پالیسی سے جوڑنے کی کوشش بھی کی۔
یہ دعویٰ دراصل ایک ایرانی جنرل محسن رضائی کے بیان پر مبنی تھا، جس میں انہوں نے کہا کہ پاکستان نے ایران کو یقین دلایا ہے کہ اگر اسرائیل نے تہران پر ایٹمی حملہ کیا تو پاکستان اسرائیل پر ایٹم بم پھینکے گا۔
تاہم اس دعوے کی نہ تو پاکستانی حکومت کی جانب سے تصدیق کی گئی، اور نہ ہی کسی سرکاری ذریعے سے اس کی توثیق ہوئی۔ تحقیق سے پتا چلا ہے کہ یہ ویڈیو مصنوئی ذہانت سے بنائی گئی تھی۔
پاکستانی سینیئر صحافی حامد میر نے اسی پوسٹ کے جواب میں لکھا کہ کسی بھی جنگ میں سچ کا سب سے بڑا نقصان ہوتا ہے۔ پاکستان نے کبھی بھی اسرائیل کے خلاف جوہری بم استعمال کرنے کی دھمکی نہیں دی اس حقیقت کے باوجود کہ اسرائیل نے ہندوستانی فضائی اڈوں کا استعمال کرتے ہوئے پاکستان پر کم از کم تین بار بمباری کرنے کا منصوبہ بنایا۔ پاکستان صرف اسرائیل کے حملے کی صورت میں جوابی کارروائی کرے گا۔
اس لیے یہ خبر کہ پاکستان نے اسرائیل پر ایٹمی حملے کی دھمکی دی ہے، حقیقت پر مبنی نہیں بلکہ ایک فیک نیوز ہے، جو غیر مصدقہ ذرائع یا سیاسی مقاصد کے تحت پھیلائی گئی۔
