دوحہ کے حمد بین الاقوامی ہوائی اڈے پر قطر کے وزیر مملکت برائے خارجہ امور ڈاکٹر محمد بن عبدالعزیز الخلیفی، قطر میں تعینات پاکستانی سفیر محمد عامر اور دیگر سفارتی حکام نے وزیراعظم کا استقبال کیا۔
وزیراعظم کے ہمراہ نائب وزیراعظم و وزیر خارجہ اسحاق ڈار، وفاقی وزیر اطلاعات و نشریات عطاءاللہ تارڑ اور معاون خصوصی طارق فاطمی بھی موجود ہیں۔
دورے کے دوران وزیراعظم اور امیر قطر کے درمیان دو طرفہ ملاقات ہوگی، جس میں اقتصادی تعاون، توانائی کی شراکت داری اور عوامی روابط کے فروغ پر تبادلہ خیال کیا جائے گا۔
یہ بھی پڑھیں: شہباز شریف قطر کے دو روزہ سرکاری دورے پر آج روانہ، کن امور پر بات چیت ہوگی؟
دونوں رہنما تجارت، سرمایہ کاری، توانائی، بنیادی ڈھانچے کی ترقی اور افرادی قوت کی برآمد جیسے شعبوں میں تعاون کو مزید وسعت دینے پر بھی بات کریں گے۔
وزیراعظم کا یہ دورہ پاکستان اور قطر کے درمیان مضبوط اور برادرانہ تعلقات کی عکاسی کرتا ہے اور مختلف شعبوں میں دوطرفہ تعاون کو مزید مستحکم بنانے کے عزم کا اظہار ہے۔
