وزیراعلیٰ پنجاب مریم نواز شریف نے بجٹ کی منظوری پر ارکان اسمبلی کو خراج تحسین پیش کرتے ہوئے کہا کہ پنجاب کا گزشتہ 30 سال سے واجب الادا قرضہ اب مکمل طور پر ختم ہو چکا ہے۔
مریم نواز نے پنجاب اسمبلی میں خطاب کرتے ہوئے کہا کہ حکومت پنجاب نے معدنیات کے شعبے میں 30 ارب روپے کی خطیر بچت کی ہے، انہوں نے کہا کہ ہماری حکومت اعلانات کے بجائے عملی اقدامات پر یقین رکھتی ہے اور وزارت معدنیات میں کیے گئے انقلابی اقدامات اسی کا ثبوت ہیں۔
انہوں نے اپنی تقریر میں مخالفین پر تنقید کرتے ہوئے کہا کہ جو کل تک نواز شریف کو مائنس کرنے کی بات کرتے تھے، آج خود مائنس ہو چکے ہیں اور انہیں کسی نے نہیں بلکہ ان کی اپنی ناقص کارکردگی نے مائنس کیا ہے۔ انہوں نے کہا کہ علیمہ خان نے خود تسلیم کیا کہ بانی مائنس ہو چکے ہیں۔
انہوں نے جنوبی پنجاب کے نام پر کی جانے والی سابقہ حکومتوں کی سیاست پر بھی سوالات اٹھائے اور کہا کہ ماضی میں جنوبی پنجاب کے ساتھ صرف وعدے کیے گئے، ہم نے ان وعدوں کو عملی شکل دینے جا رہے ہیں اور صاف پانی کا سب سے بڑا منصوبہ جنوبی پنجاب سے شروع کررہے ہیں۔
مریم نواز کا کہنا تھا کہ ان کا مقابلہ کسی اور سے نہیں بلکہ اپنی جماعت کے رہنماؤں، نواز شریف اور شہباز شریف، سے ہے۔ انہوں نے کہا کہ ہم نے 5335 ارب روپے کا تاریخ کا سب سے منظم بجٹ دیا ہے، جو کہ مکمل طور پر ٹیکس فری ہے۔
انہوں نے انڈیا کے خلاف حالیہ کامیابی پر قوم، پارلیمنٹیرینز اور افواج پاکستان کو مبارکباد دی اور وزیراعظم شہباز شریف کو خراج تحسین پیش کیا۔ ایران پر اسرائیلی حملے کی مذمت کرتے ہوئے انہوں نے کہا کہ پاکستان ایک پرامن ریاست ہے اور ایران کے ساتھ اظہار یکجہتی قابل فخر ہے۔
مزید پڑھیں:کے پی حکومت کی امداد کے منتظر ایک ہی خاندان کے 18 افراد دریائے سوات میں بہہ گئے
وزیراعلیٰ نے کہا کہ ہم نے نئے ٹیکس لگانے کے بجائے ٹیکس نیٹ کو وسیع کیا، جس کے نتیجے میں ریونیو میں اضافہ ہوا ہے۔ وزیر خزانہ مجتبیٰ شجاع الرحمان اور سیکرٹری خزانہ مجاہد شیر دل کی خدمات کو سراہتے ہوئے انہوں نے کہا کہ بجٹ نواز شریف کے وژن کے مطابق تیار کیا گیا۔
آخر میں انہوں نے کہا کہ پنجاب بھر میں ہر شہری کو برابر کا حق دیا جا رہا ہے، چاہے وہ لاہور کا رہائشی ہو یا بھکر، لیہ، راجن پور، ڈی جی خان یا رحیم یار خان کا۔
