پنجاب کی وزیر اطلاعات عظمیٰ بخاری نے خیبرپختونخوا کے حالیہ سوات حادثے پر شدید ردعمل دیتے ہوئے کہا ہے کہ یہ واقعہ مکمل طور پر روکا جا سکتا تھا، مگر نااہلی اور غفلت کے باعث قیمتی جانیں ضائع ہوئیں۔
ہفتے کے روز لاہور میں میڈیا سے گفتگو کرتے ہوئے انہوں نے کہا کہ جب دریائے سوات میں حادثہ پیش آیا، اس وقت خیبرپختونخوا کے وزیر اعلیٰ اڈیالہ جیل میں ملازمت کر رہے تھے۔
عظمیٰ بخاری نے کہا کہ خیبرپختونخوا حکومت کی جانب سے ریسکیو یا حفاظتی اقدامات نہ کرنا اس بات کا ثبوت ہے کہ حکومت میں رہنے کا جواز ختم ہو چکا ہے، ان کا کہنا تھا کہ اگر کچھ نہیں کر سکتے تھے تو کم از کم کشتی یا ریسکیو اسٹیشن ہی قائم کر دیتے۔
وزیر اطلاعات پنجاب نے مزید کہا کہ یہ وہی لوگ ہیں جو کہتے تھے کہ میاں صاحب کا جہاز کھانا لے کر آتا ہے، لیکن میرے پاس ثبوت ہیں کہ خیبرپختونخوا کے ہیلی کاپٹروں میں بھی کھانے رکھے جاتے رہے۔
ان کا کہنا تھا کہ 2022 میں بھی مدد کے لیے لوگ آواز دے رہے تھے لیکن اس وقت بھی صرف علیمہ خان کو بچانے کے لیے طیارہ اڑایا گیا۔
ان کا مزید کہنا تھا کہ ریسکیو 1122 ان کے لیے اس وقت سرگرم ہوتی ہے جب انہیں سوات جانا ہو۔ انہوں نے دریائے سوات کے اطراف تجاوزات پر سوال اٹھاتے ہوئے کہا کہ یہ تعمیرات کن کی پرچی پر ہوئیں؟ اور جو فنڈز خیبرپختونخوا حکومت کو ملے، ان کا فوری آڈٹ ہونا چاہیے۔
عظمیٰ بخاری نے کہا کہ اگر ایسا واقعہ پنجاب میں پیش آتا تو یہاں کی حکومت اور عوام فوری حرکت میں آتے جیسا کہ مری کے واقعے کے بعد دیکھا گیا۔ انہوں نے آخر میں کہا کہ پنجاب حکومت محرم الحرام کی آمد کے حوالے سے مکمل تیار ہے۔
