پنجاب ڈیزاسٹر مینجمنٹ اتھارٹی (پی ڈی ایم اے) نے 7 سے 9 جولائی تک صوبہ پنجاب کے مختلف دریاؤں اور ندی نالوں میں سیلاب کی وارننگ جاری کی ہے۔
پی ڈی ایم اے کے مطابق دریائے چناب، جہلم، راوی اور ان سے ملحقہ ندی نالوں میں پانی کی سطح میں غیر معمولی اضافے کا امکان ہے۔
پنجاب کے مختلف علاقوں میں ممکنہ سیلاب کی صورتحال پر آگاہ کرتے ہوئے پی ڈی ایم اے نے کہا ہے کہ دریائے چناب میں مرالہ کے مقام پر اونچے درجے کے سیلاب کی وارننگ جاری کی گئی ہے۔ اس کے علاوہ دریائے راوی اور چناب سے ملحقہ نالوں بشمول بہیں، بسنتر، ڈیگ، ایک، پلکھو، بھمبر، ہلسی اور ڈورا میں درمیانے سے اونچے درجے کے سیلاب کی وارننگ جاری کی گئی ہے۔
پی ڈی ایم اے نے ڈیرہ غازی خان کے رود کوہیوں میں فلیش فلڈنگ کی وارننگ بھی جاری کی ہے، جس کے باعث ان علاقوں میں بھی فوری احتیاطی تدابیر اختیار کرنے کی ضرورت ہے۔
یہ بھی پڑھیں:‘اب ایسا نہیں ہوگا’،مریم نواز کا سرکاری اسپتالوں میں اصلاحات کا اعلان
مزید برآں، پی ڈی ایم اے نے لاہور، گجرانوالہ، سیالکوٹ اور راولپنڈی ڈویژن میں اربن فلڈنگ کے خدشات کو مدنظر رکھتے ہوئے متعلقہ حکام کو الرٹ جاری کیا ہے۔
پی ڈی ایم اے نے صوبہ بھر کے کمشنرز، ڈپٹی کمشنرز اور واسا حکام کو ممکنہ سیلابی صورتحال کے حوالے سے بروقت اقدامات کرنے کی ہدایات دی ہیں تاکہ عوام کی زندگی اور املاک کو نقصان سے بچایا جا سکے۔
مزید پڑھیں:وزیراعظم نااہل ہو سکتا ہے تو ایوان کی بے توقیری پر کارروائی کیوں نہیں؟ اسپیکر پنجاب اسمبلی
پنجاب ڈیزاسٹر مینجمنٹ اتھارٹی نے تمام متعلقہ اداروں اور ریسکیو 1122 کو پیشگی انتظامات مکمل کرنے کی ہدایات بھی جاری کی ہیں تاکہ کسی بھی ناخوشگوار صورتحال سے نمٹنے کے لیے تمام وسائل بروئے کار لائے جا سکیں۔
