وزیراعظم محمد شہباز شریف نے ملک میں زرعی پیدوار میں اضافے، زرعی اصلاحات اور جدید ٹیکنالوجی کے مؤثر استعمال کیلئے ایک جامع اور قلیل و طویل مدتی لائحہ عمل پیش کرنے کی ہدایت جاری کی ہے، جس میں کہا گیا ہے کہ زرعی پیداوار میں بہتری اوربرآمدات میں اضافہ حکومت کی اولین ترجیع ہے۔
وزیراعظم کی زیر صدارت زرعی شعبے کی کارکردگی اور جاری اصلاحات پر ایک اہم جائزہ اجلاس آج اسلام آباد میں منعقد ہوا، جس میں زرعی شعبے پر قائم ٹاسک فورس کی جانب سے وزیراعظم کو بریفنگ دی گئی، جس میں ربیع و خریف کی بڑی فصلوں کی گزشتہ برس کی پیداوار، کسانوں کو درپیش مسائل، آئندہ کا لائحہ عمل اور زرعی اصلاحات پر پیش رفت سے آگاہ کیا گیا۔ اس موقع پر وزیراعظم نے زرعی اجناس کی فی ایکڑ پیداوار میں اضافے کیلئے زرعی تحقیقی مراکز کو مزید فعال بنانے کی ہدایت دی۔
وزیراعظم نے زرعی شعبے کی بہتری، ویلیو ایڈیشن اور زرعی مصنوعات کی برآمدات کو حکومت کی اولین ترجیح قرار دیتے ہوئے کہا کہ معیاری بیج، جدید زرعی مشینری، جغرافیائی منصوبہ بندی اور آسان شرائط پر قرضوں کی فراہمی کیلئے عملی اقدامات پر مبنی منصوبہ فوری طور پر پیش کیا جائے۔ انہوں نے زرعی تحقیقی مراکز میں پبلک پرائیویٹ پارٹنرشپ کے تحت جدید تحقیق کو فروغ دینے پر زور دیا۔
وزیراعظم نے مصنوعی ذہانت اور جدید ٹیکنالوجی کے استعمال کو بھی زرعی ترقی میں کلیدی قرار دیا اور بین الاقوامی ماہرین کی خدمات حاصل کرنے کی ہدایت کی۔ انہوں نے چھوٹے اور درمیانے درجے کی زرعی صنعت کو ترقی دینے کیلئے بھی واضح لائحہ عمل طلب کیا تاکہ زرعی اجناس کی ویلیو ایڈیشن سے برآمدی اشیاء کی تیاری کو فروغ مل سکے۔
وزیراعظم نے ہدایت دی کہ منافع بخش فصلوں کی کاشت کو فروغ دینے اور پاکستان کو غذائی تحفظ کے حوالے سے خود کفیل بنانے کیلئے کسانوں کو ہر ممکن رہنمائی فراہم کی جائے۔ انہوں نے کسانوں اور دیگر اسٹیک ہولڈرز سے مشاورت کے عمل کو یقینی بنانے، صوبائی حکومتوں کے ساتھ روابط مزید مربوط بنانے اور موسمیاتی تبدیلیوں کے اثرات سے بچاؤ کیلئے اقدامات کی ہدایت بھی دی۔
اس کے علاوہ، وزیراعظم نے سندھ اور بلوچستان میں کپاس کی کاشت کیلئے جامع منصوبہ بندی اور نباتاتی ایندھن کو توانائی مکس میں شامل کرنے کیلئے تحقیق اور منصوبہ بندی کی ضرورت پر بھی زور دیا۔
وزیراعظم شہباز شریف نے اجلاس کے اختتام پر زرعی شعبے میں مزید اصلاحات کیلئے جلد از جلد ایک جامع لائحہ عمل پیش کرنے کی ہدایت کی، اجلاس میں وفاقی وزیر برائے غذائی تحفظ رانا تنویر حسین، زرعی ماہرین اور متعلقہ اعلیٰ حکام نے شرکت کی۔
