وزیر خارجہ اسحاق ڈار نے چین کے وزیر خارجہ وانگ ژی سے شنگھائی تعاون تنظیم (SCO) کی کانفرنس کے موقع پر ملاقات کی، جس میں دونوں رہنماؤں نے باہمی دلچسپی کے اہم امور، بالخصوص چین-پاکستان اقتصادی راہداری (CPEC) پر تفصیل سے بات چیت کی۔
ترجمان دفتر خارجہ کے مطابق یہ ملاقات تیانجن میں ایس سی او اجلاس کی سائیڈ لائنز پر ہوئی، جہاں اسحاق ڈار نے چین کو کامیاب کانفرنس کے انعقاد پر مبارکباد دی اور چینی قیادت کی مہمان نوازی پر شکریہ ادا کیا۔
دونوں وزرائے خارجہ نے پاکستان اور چین کی “ہر موسم کی تزویراتی شراکت داری” کو مزید مضبوط بنانے پر اتفاق کیا اور کثیرالجہتی شعبوں میں جاری تعاون کو تسلی بخش قرار دیا۔
ملاقات میں سی پیک کے تحت جاری منصوبوں، خطے میں امن و استحکام، ترقیاتی تعاون اور باہمی روابط کو وسعت دینے پر گفتگو ہوئی۔
دونوں فریقین نے اس عزم کا اعادہ کیا کہ چین اور پاکستان علاقائی ترقی اور خوشحالی کے لیے مل کر کام جاری رکھیں گے۔
