محکمہ موسمیات نے الرٹ جاری کیا ہے کہ 20 جولائی کے بعد لاہور میں مون سون کی نئی لہر داخل ہوگی، جوکہ وسیع پیمانے پر اور مسلسل بارشیں لاسکتی ہے۔
محکمہ موسمیات لاہور کے ڈپٹی ڈائریکٹر اختر محمود نے کہا ہے کہ ہواؤں کے سازگار رخ کے باعث آئندہ ایک سے دو روز تک بارش کا سلسلہ جاری رہنے کا امکان ہے۔
انہوں نے خبردار کیا ہے کہ اس دوران بعض علاقوں میں دھند کی شدت میں اضافہ ہوسکتا ہے، جو نہ صرف حدِ نگاہ کو متاثر کرے گا بلکہ فضائی معیار پر بھی اثر ڈال سکتا ہے۔
اختر محمود کا کہنا ہے کہ 20 جولائی کے بعد مون سون سسٹم کی ایک نئی لہر لاہور میں داخل ہونے کا امکان ہے، جو شہر میں مزید وسیع پیمانے پر اور مسلسل بارشیں لاسکتی ہے۔
واضح رہے کہ لاہور شہر میں بدھ کے روز بھی وقفے وقفے سے بارش کا سلسلہ جاری رہا، جس کے باعث گرمی اور حبس میں کمی آئی اور درجہ حرارت میں واضح کمی دیکھی گئی۔
محکمہ موسمیات نے شہریوں کو ہدایت کی ہے کہ وہ موسمی الرٹس سے باخبر رہیں اور بارش و دھند کے دوران سفر کرتے وقت احتیاطی تدابیر اختیار کریں۔
مزید پڑھیں: بارش کی وجہ سے لوگوں کو تکلیف ہوئی معذرت خواہ ہیں، وزیرِاعلیٰ سندھ
جولائی کی معمول کی شدید گرمی اور حبس کے دوران ہونے والی بارش نے شہریوں کو وقتی ریلیف فراہم کیا ہے، تاہم کئی علاقوں میں پانی جمع ہونے اور ٹریفک کی روانی متاثر ہونے کی اطلاعات بھی موصول ہوئی ہیں۔
محکمہ موسمیات کے مطابق آئندہ چند روز شہریوں کے لیے موسم خوشگوار مگر محتاط رہنے کا پیغام ہے۔
