پاکستان اسٹاک ایکسچینج نے کاروباری ہفتے کے آخری روز شاندار تیزی کا مظاہرہ کرتے ہوئے 100 انڈیکس میں ایک لاکھ 40 ہزار پوائنٹس کی سطح عبور کر لی، جو ملکی اسٹاک مارکیٹ کی تاریخ کا ایک نیا سنگ میل ہے۔
ٹریڈنگ کے دوران انڈیکس میں 1,773 پوائنٹس کا نمایاں اضافہ ہوا، جس سے انڈیکس 1,40,439 پوائنٹس پر پہنچ گیا۔ دن کے دوران انڈیکس نے 1,40,585 پوائنٹس کی بلند ترین سطح بھی چھوئی۔
اس سے ایک روز قبل 100 انڈیکس 1,38,665 پوائنٹس پر بند ہوا تھا۔ مارکیٹ میں سرمایہ کاروں کے اعتماد میں اضافے، معاشی اصلاحات اور غیرملکی سرمایہ کاری میں بہتری کو اس تیزی کی اہم وجوہات قرار دیا جا رہا ہے۔
ماہرین کے مطابق مثبت معاشی اشاریے اور پالیسی اقدامات نے مارکیٹ میں ایک نئی امید پیدا کی ہے جس کا اثر سرمایہ کاری کے رجحان پر بھی واضح طور پر دیکھا جا سکتا ہے۔
