مانچسٹر سٹی نے جیمز ٹرافورڈ کے ساتھ ساڑھے چھ ارب سے زائد روپے میں دوبارہ معاہدہ کر لیا

مانچسٹر سٹی ایک بار پھر گول کیپر جیمز ٹرافورڈ کو 27 ملین پاؤنڈ میں سائن کرنے جا رہی ہے، دو سال بعد جب وہ برنلے میں شامل ہوئے تھے۔

22 سالہ گول کیپر، جو سٹی کی اکیڈمی سے وابستہ رہا ہے، جولائی 2023 میں ایک معاہدے کے تحت برنلے میں شامل ہوا تھا، جس کی مالیت اضافی ادائیگیوں سمیت 19 ملین پاؤنڈ تک تھی۔

گزشتہ سیزن میں ٹرافورڈ نے شاندار کارکردگی کا مظاہرہ کیا، جب اسکاٹ پارکر کی زیرِ نگرانی برنلے کی ٹیم نے پریمیئر لیگ میں واپسی کی۔ اس دوران انہوں نے 45 چیمپئن شپ میچز میں 29 کلین شیٹس رکھیں اور انہیں چیمپئن شپ کی “ٹیم آف دی ایئر” میں شامل کیا گیا۔

مانچسٹر سٹی کے پاس ٹرافورڈ کے لیے ایک بائی بیک کلاز موجود تھااور ساتھ ہی وہ کسی دوسرے کلب کی پیشکش کا مقابلہ بھی کر سکتے تھے۔ نیوکاسل کی جانب سے 27 ملین پاؤنڈ کی پیشکش سامنے آنے کے بعد سٹی نے اسی رقم کی پیشکش کی، جسے ٹرافورڈ نے قبول کرتے ہوئے دوبارہ اتحاد اسٹیڈیم آنے کا فیصلہ کیا۔

ٹرافورڈ سٹی کے منیجر پیپ گوارڈیولا کے پاس چوتھے گول کیپر ہوں گے۔ اس وقت ایڈرسن، اسٹیفان اورٹیگا اور مارکس بیٹینلی پہلے ہی کلب میں موجود ہیں۔

امکان ظاہر کیا جا رہا ہے کہ ٹرافورڈ، برازیل کے انٹرنیشنل گول کیپر ایڈرسن کو نمبر ون پوزیشن کے لیے چیلنج کریں گے، جو گزشتہ آٹھ سالوں سے سٹی کے اولین گول کیپر ہیں۔

 ایڈرسن اس وقت اپنے معاہدے کے آخری سال میں ہیں اور ان کی گالاٹا سرائے منتقلی کی افواہیں گردش میں ہیں، تاہم تاحال مانچسٹر سٹی کو ان کے لیے کوئی باضابطہ پیشکش موصول نہیں ہوئی۔ جرمن گول کیپر اسٹیفان اورٹیگا کے مستقبل پر بھی غیر یقینی صورتحال برقرار ہے۔

مزید پڑھیں:معروف ریسلر ہلک ہاگن دل بند ہونے سے ہلاک

ٹرافورڈ نے 2015 میں مانچسٹر سٹی کی اکیڈمی جوائن کی تھی، تاہم وہ کبھی کلب کی سینئر ٹیم کے لیے میدان میں نہیں اُترے۔ وہ اس دوران ایکریگٹن اسٹینلی اور بولٹن وانڈرز کے لیے قرض پر کھیل چکے ہیں۔