سینئر صوبائی وزیر مریم اورنگزیب نے پیٹرول موٹر بائیک کو الیکٹرک میں تبدیل کرنے والے افراد کو ایک لاکھ روپے کی نقد رقم دینے کا اعلان کر دیا ہے۔
پریس کانفرنس کرتے ہوئے مریم اورنگزیب کا کہنا تھا کہ پی ایچ اے نے درخت لگانے کی مہم کا آغاز کر دیا ہے، جو وزیراعلیٰ پنجاب کے وژن “پلانٹ فار پاکستان” کا حصہ ہے۔ اس مہم کا مقصد پنجاب میں اربن فاریسٹ کے ذریعے گرین کور کو بڑھانا ہے۔
انہوں نے کہا کہ پنجاب کی پہلی اسموگ گن جلد میڈیا کے سامنے پیش کی جائے گی، جب کہ پیٹرول موٹر بائیک کو الیکٹرک میں تبدیل کرنے والوں کو ایک لاکھ روپے کیش دیئے جائیں گے۔ لائٹس کو ایل ای ڈی پر منتقل کرنے والوں کو کاربن گرین کریڈٹ بھی دیا جائے گا۔
مریم اورنگزیب کا کہنا تھا کہ “پلانٹ فار پاکستان” میں پانچ کروڑ درخت لگانے کا ہدف مقرر کیا گیا ہے اور اس کے تحت ہر درخت کی مانیٹرنگ اور میپنگ کی جا رہی ہے۔ آسٹریلیا کی ٹیکنالوجی کی انسٹالیشن اس سال مکمل ہونے والی ہے۔
صوبائی وزیر نے مزید کہا کہ پنجاب میں ٹیکنالوجی بیسڈ فائر کنٹرول فورس قائم کی جائے گی، جس کی نگرانی بینک آف پنجاب کرے گا۔ فاریسٹ لائن کو قبضے سے آزاد کرایا گیا ہے اور وزیراعلیٰ پنجاب کا وژن ہے کہ فاریسٹ کور کو بڑھایا جائے اور اس کی حفاظت کو یقینی بنایا جائے۔
انہوں نے لاہور کے شہریوں کے لیے بھی خوشخبری دی کہ وہ 1399 پر کال کر کے پودے گھر پر منگوا سکتے ہیں، یہ پودے وزیراعلیٰ پنجاب مریم نواز کا تحفہ ہیں۔ لاہور میں رنگ روڈ کے گرد تین لاکھ پودے لگائے جائیں گے۔
جب کہ لاہور کے گزشتہ دس سالوں سے جاری اسموگ کے مسئلے پر قابو پانے کے لیے سات ایئر کوالٹی مانیٹر پنجاب ایئر کوالٹی سسٹم میں نصب کر دیے گئے ہیں۔
مریم اورنگزیب نے شہریوں سے اپیل کی کہ وہ زیادہ سے زیادہ درخت لگائیں تاکہ ایئر کوالٹی انڈیکس بہتر ہو سکے۔
