حکومتِ پاکستان نے پیٹرولیم مصنوعات کی قیمتوں میں تبدیلی کا نوٹیفکیشن جاری کر دیا ہے، جس کے مطابق پیٹرول کی قیمت میں کمی، جب کہ ہائی اسپیڈ ڈیزل مہنگا کر دیا گیا ہے۔ نئی قیمتوں کا اطلاق یکم اگست 2025 کی رات 12 بجے سے ہوگا۔
وزارتِ خزانہ کی جانب سے جاری کردہ اعلامیے کے مطابق پیٹرول کی قیمت میں سات روپے 54 پیسے فی لیٹر کمی کر دی گئی ہے، جس کے بعد نئی قیمت 264 روپے 61 پیسے فی لیٹر مقرر کی گئی ہے۔
دوسری جانب ہائی اسپیڈ ڈیزل کی قیمت میں ایک روپیہ 48 پیسے فی لیٹر اضافہ کیا گیا ہے اور نئی قیمت 285 روپے 83 پیسے فی لیٹر ہوگی۔
یاد رہے کہ گزشتہ روز ڈان اخبار کی رپورٹ میں بتایا گیا تھا کہ پیٹرول اور ڈیزل کی قیمتوں میں مسلسل چاربار اضافے کے بعد آئندہ 15 روزہ مدت کے دوران بالترتیب تقریباً نو روپے اور تین روپے 50 پیسے فی لیٹر کمی کی توقع ہے، جس کی وجہ عالمی منڈی میں تیل کی قیمتوں اور درآمدی پریمیم میں کمی ہے۔
ڈیزل بھاری ٹرانسپورٹ، ریلوے اور زرعی مشینری جیسے ٹریکٹرز اور ٹیوب ویلز میں بنیادی ایندھن کے طور پر استعمال ہوتا ہے، اس لیے اس کی قیمتیں مہنگائی پر اثر ڈالتی ہیں۔
مزید پڑھیں: لاہور: بکرا منڈی کولڈ اسٹوریج سے 10 ہزار کلو مضر صحت گوشت برآمد
ڈان اخبار کے رپورٹ میں مزید کہا گیا تھا کہ اس وقت حکومت پیٹرول اور ڈیزل دونوں پر مختلف لیویز کے ذریعے تقریباً 98 روپے فی لیٹر حاصل کر رہی ہے، حالانکہ تمام پیٹرولیم مصنوعات پر جنرل سیلز ٹیکس (جی ایس ٹی) کی شرح صفر ہے۔
اس میں ڈیزل پر 77.01 روپے اور پیٹرول اور ہائی اوکٹین مصنوعات پر 78.02 روپے فی لیٹر پیٹرولیم لیوی اور کلائمیٹ سپورٹ لیوی (سی ایس ایل) شامل ہیں، جن میں سے 2.25 روپے فی لیٹر سی ایس ایل کی مد میں وصول کیے جا رہے ہیں۔
