ڈیرہ غازی خان میں 30 من مردہ جانوروں کا گوشت برآمد، چار افراد گرفتار

اسسٹنٹ کمشنر ڈی جی خان نے شہر کے مختلف علاقوں میں مردہ جانوروں کا گوشت فروخت کرنے والوں کے خلاف کریک ڈاؤن کرتے ہوئے مضر صحت گوشت برآمد کرلیا۔

اسسٹنٹ کمشنر کا کہنا ہے کہ مردہ جانوروں کا گوشت ہوٹلوں میں سپلائی کیا جارہا تھا۔

انہوں نے بتایا کہ شہر کے مختلف علاقوں میں چھاپہ مار کارروائی کے دوران مردہ جانوروں کا 30 من گوشت برآمد کر کے 4 افراد کو گرفتار کرلیا ہے

واضح رہے کہ 31 جولائی کو لاہور میں ڈی جی فوڈ اتھارٹی عاصم  جاوید نے رات گئےٹیم کے ہمراہ بکرا منڈی میں موجود کولڈ اسٹور پر چھاپہ مار ا جس دوران  زائد العیاد اور مضر صحت  گوشت  برآمد کیا ،جس میں چار افراد کو گرفتار کر کے ان کے خلاف مقدمہ درج کیا گیا۔

ڈی جی فوڈ اتھارٹی کے مطابق بکر منڈی میں قائم ایک کولڈا سٹور میں ایکسپائر گوشت ذخیرہ کیا گیا تھا، جہاں کا درجہ حرارت مقررہ حد کے مطابق نہیں تھا۔ گوشت کی رنگت نیلی اور کالی ہو چکی تھی اور کولڈ سٹور میں شدید تعفن، حشرات اور جانوروں کی بھرمار پائی گئی، صفائی ستھرائی کے انتہائی ناقص انتظامات بھی اس مقام پر دیکھنے میں آئے۔

عاصم جاوید نے انکشاف کیا کہ یہ گوشت بیمار اور مردہ جانوروں سے تیار کیا جا رہا تھا، جنہیں نواحی علاقوں سے لا کر اس اسٹور میں رکھا جاتا تھا، یہ ناقص اور غیر معیاری گوشت لاہور شہر کے مختلف ہوٹلز کو سپلائی کیا جانا تھا، تاہم بروقت کارروائی کرتے ہوئے تمام تر گوشت تلف کر دیا گیا ہے۔

انہوں نے کہا کہ ٹیموں کو ہدایت کی گئی ہے کہ وہ جلد از جلد اس گھناؤنے دھندے میں ملوث جعلسازوں کے گروہ کی مکمل تفصیلات فراہم کریں، غیر قانونی مذبح خانوں کے خلاف قانون سازی میں ترامیم کےلیے متعلقہ محکموں کے ساتھ اشتراک کیا جا رہا ہے۔

مزید پڑھیں:لاہور: بکرا منڈی کولڈ اسٹوریج سے 10 ہزار کلو مضر صحت گوشت برآمد

عاصم جاوید نے واضح کیا کہ خوراک میں جعلسازی کرنے والوں کے گرد شکنجہ مزید سخت کیا جا رہا ہے اور انہیں منطقی انجام تک پہنچایا جائے گا۔ شہریوں سے اپیل ہے کہ خوراک کے چناؤ میں احتیاط برتیں اور غذائیت سے بھرپور اشیا کے استعمال کو یقینی بنائیں۔