پنجاب، بالائی خیبرپختونخوا، گلگت بلتستان اور کشمیر کے مختلف علاقوں میں موسلا دھار بارش کا سلسلہ جاری ہے، جبکہ خیبرپختونخوا میں بادل پھٹنے کے باعث سیلابی ریلوں سے جانی و مالی نقصان ہوا ہے۔
باجوڑ کی تحصیل سلارزئی کے گاؤں جبراڑئی میں شدید بارش کے نتیجے میں آنے والے سیلابی ریلے میں ریسکیو 1122 کے مطابق اب تک 8 افراد کی لاشیں نکالی جا چکی ہیں اور چار زخمیوں کو ہسپتال منتقل کیا گیا ہے۔
مقامی افراد کے مطابق تقریباً 17 افراد لاپتہ ہیں جن کی تلاش کے لیے ڈسٹرکٹ ایمرجنسی آفیسر امجد خان کی نگرانی میں سرچ اور ریسکیو آپریشن جاری ہے۔
ریسکیو حکام کے مطابق بٹگرام اور نیل بند میں بھی سیلابی ریلے سے 10 افراد ہلاک ہوئے ہیں جبکہ 18 کی تلاش جاری ہے۔ لوئر دیر میں بارش کے باعث مکان کی چھت گرنے سے 9 افراد ملبے تلے دب گئے، جن میں سے 5 جاں بحق اور 4 زخمی ہسپتال منتقل کیے گئے۔
پاکستان کے زیرانتظام کشمیر میں مختلف واقعات میں آٹھ افراد جاں بحق اور دو زخمی ہوئے، جبکہ بیشتر دریاؤں اور ندی نالوں میں سیلابی صورتحال ہے۔
مانسہرہ کے علاقے بسیاں میں مہران کار سیلابی ریلے میں بہہ گئی، دو افراد جاں بحق اور چار کو بچا لیا گیا۔
یہ بھی پڑھیں: واشنگٹن کے اسلام آباد اور نئی دہلی، دونوں سے اچھے تعلقات ہیں، امریکا
سوات اور لوئر دیر میں شدید بارشوں کے باعث الرٹ جاری کیا گیا ہے جس میں کہا گیا ہے کہ دریاؤں میں پانی کی سطح تیزی سے بڑھ رہی ہے اور یہ بلند سیلابی کیفیت نچلے علاقوں کو متاثر کر سکتی ہے۔
گلگت بلتستان میں لینڈ سلائیڈنگ اور مڈ سلائیڈنگ کے باعث مختلف شاہراہیں بند ہو گئی ہیں۔ نیشنل ہائی وے اتھارٹی کے مطابق جگلوٹ سکردو روڈ پر چار مختلف مقامات پر ٹریفک معطل ہے۔
