ایرانی صدر مسعود پزشکیان نے پاکستان میں بارشوں اور سیلاب کے باعث قیمتی جانی نقصان اور زخمی ہونے والے افراد پر وزیراعظم اور پاکستانی عوام سے تعزیت کا اظہار کیا ہے۔
انہوں نے سیلاب متاثرین کی بحالی کے لیے مدد کی بھی پیشکش کی اور کہا کہ ایران متاثرہ افراد کی تکالیف کم کرنے کے لیے ہر طرح کے تعاون اور انسانی و امدادی معاونت کے لیے تیار ہے، ایرانی صدر نے زخمیوں کی جلد صحت یابی کی بھی دعا کی۔
دوسری جانب سعودی وزارت خارجہ نے اپنے بیان میں حکومت اورپاکستانی عوام سے تعزیت اور ہمدردی کا اظہار کیا گیا ہے۔
مزید پڑھیں: روسی صدر کا آصف زرداری کو خط، بارشوں اور سیلاب سے ہونے والے جانی نقصان پر دکھ کا اظہار
وزارت خارجہ نے کہا کہ وہ مشکل کی اس گھڑی میں پاکستان کے ساتھ کھڑے ہیں۔ سعودی عرب نے جاں بحق افراد کے لواحقین سے اظہار یکجہتی کرتے ہوئے زخمیوں کی جلد صحتیابی کی بھی دعا کی۔
یاد رہے کہ ملک بھر میں حالیہ بارشوں، سیلاب اور لینڈسلائیڈنگ کے باعث مختلف حادثات میں 344 افراد جاں بحق اور 148 زخمی ہوچکے ہیں۔
