صوبائی وزیر اطلاعات و نشریات پنجاب عظمیٰ بخاری نے کہا ہے کہ جس کا دل چاہتا ہے نو مئی کے ملزمان کے گناہ مریم نواز کے کھاتے میں ڈال دیتا ہے۔ کیا وزیر اعلیٰ پنجاب خیبر پختونخوا حکومت کی طرح نو مئی کے دہشتگردوں کو شیلٹر فراہم کریں؟
اپنے بیان میں عظمیٰ بخاری نے نو مئی کے مقدمات میں نامزد اور مطلوب افراد کی گرفتاریوں پر تنقید کو مسترد کرتے ہوئے کہا ہے کہ مظلومیت کا کارڈ اور چادر چار دیواری کا بہانہ بنانے والے غلط فہمی میں نہ رہیں۔ کور کمانڈر کے یونیفارم کی توہین ناقابل قبول ہے اور اس پر کوئی نرم رویہ برداشت نہیں کیا جائے گا۔
انہوں نے کہا کہ جو لوگ نو مئی کے واقعہ میں ملوث ہیں، ان کو قانون کے مطابق سزائیں دی جائیں گی۔ یہ عمران خان کی حکومت نہیں بلکہ مریم نواز کی حکومت ہے، جس میں تمام ادارے آزاد اور خودمختار ہیں۔
انہوں نے سوال اٹھایا کہ کیا نو مئی کے دہشتگردوں کو پی ٹی آئی کی طرح پنجاب حکومت بھی تحفظ دے گی؟
وزیرِ اطلاعات نے کہا کہ کورکمانڈر ہاؤس بھی ایک گھر ہے، جہاں چادر اور چار دیواری کی بھی خلاف ورزی ہوئی، یہ صرف تحریک انصاف کے لوگوں کا حق نہیں کہ چادر چار دیواری کا مظلومیت کا کارڈ کھیلیں۔
عظمیٰ بخاری کا کہنا تھا کہ نو مئی ایک ناکام بغاوت تھی، جس کے تمام شواہد سامنے آچکے ہیں اور جو لوگ اس سازش میں ملوث ہیں، وہ سیاسی آڑ میں ریاست پر حملہ اور شہداء کے مجسمے جلانے کی کوئی معافی کے مستحق نہیں۔
انہوں نے واضح کیا کہ اشتہاریوں اور مفروروں کو قانون کے مطابق گرفتار کرنا حکومت کا فرض ہے، یہ کسی کی خواہش نہیں۔ مقدمات میں نامزد اور مطلوب ملزمان کو ہر صورت سلاخوں کے پیچھے ہونا چاہیے۔ اشتہاریوں اور مفروروں کو پکڑنا کسی کی خواہش نہیں بلکہ قانون کا فرض ہے۔
واضح رہے کہ عظمیٰ بخاری کا یہ بیان نو مئی کے ملزمان کی گرفتاریوں کے خلاف ہونے والی تنقید کے جواب میں سامنے آیا ہے۔ انہوں نے کہا کہ جو کوئی بھی نو مئی کے ملزمان کے گناہ مریم نواز کے کھاتے میں ڈالنے کی کوشش کرے، وہ غلط فہمی کا شکار ہے۔
مزید پڑھیں: بلاول بھٹو کا سندھ کے سیلاب متاثرین کے گھروں میں سولر سسٹمز نصب کرنے کا اعلان
ذہن نشین رہے کہ گزشتہ روز عظمیٰ بخاری نے اپنے بیان میں بانی پی ٹی آئی عمران خان پر تنقید کرتے ہوئے کہا تھا کہ مقبولیت تو فرعون اور شیطان کی بھی بہت ہے لیکن وہ فرشتے نہیں بن سکتے۔نو مئی کرنے اور کروانے والے کسی معافی کے مستحق نہیں، 9 مئی ایک ناکام بغاوت تھی جس کے تمام شواہد منظر عام پر آ چکے ہیں۔
صوبائی وزیر اطلاعات کا مزید کہنا تھا کہ ناکام بغاوت اور سازش کے مرتکب کردار سیاسی لبادے میں نہیں چھپ سکتے، سیاست کی آڑ میں ریاست پر چڑھائی اور شہدا کے مجسمے جلا کر کون سی قوم کی خدمت کی گئی؟
