این ڈی ایم اے نے مون سون سیزن کے دوران اب تک ہونے والی جانی اور مالی نقصان سے متعلق رپورٹ جاری کردی ہے۔
نیشنل ڈیزاسٹر مینجمنٹ اتھارٹی ( این ڈی ایم اے ) کی رپورٹ کے مطابق حالیہ مون سون بارشوں اور سیلاب سے 26 جون سے 28 اگست تک 819 افراد جاں بحق اور ایک ہزار 111 افراد زخمی ہوئے ہیں۔
این ڈی ایم اےکے مطابق صوبہ پنجاب میں 182 اور خیبر پختونخوا میں 479 اموات ہوئی ہیں، جب کہ سندھ میں57 اور بلوچستان میں 24 افراد جاں بحق ہوئے ہیں۔ اسی طرح گلگت بلتستان میں 41 اور آزاد کشمیر میں 28 افراد جاں بحق ہو چکے ہیں۔
مزید پڑھیں: سیلاب سے کسان تباہ، حکومت آخر کیا کررہی ہے؟
رپورٹ کے مطابق مون سون سیزن کے دوران تاحال اسلام آباد میں 8 افراد جاں بحق ہوچکے ہیں۔ گزشتہ 24 گھنٹوں کے دوران ملک بھر میں 14 افراد جاں بحق اور 4 زخمی ہوئے ہیں۔ ان میں سے 13 افراد کا تعلق پنجاب اور ایک کا کشمیر سے ہے، جب کہ زخمی ہونے والوں میں سے تین کا تعلق پنجاب اور ایک کا خیبرپختونخوا سے ہے۔
رپورٹ میں املاک کے نقصان کے حوالے سے بتایا گیا ہے کہ مون سون کے دوران گزشتہ 24 گھنٹے میں 606 گھروں کو نقصان پہنچا، جب کہ 505 مویشی ہلاک ہوچکے ہیں۔
