محکمہ موسمیات نے خبردار کیا ہے کہ آئندہ دنوں میں ملک کے مختلف حصوں میں گرج چمک کے ساتھ تیز بارشیں ہوں گی اور بالائی علاقوں میں لینڈ سلائیڈنگ کا خطرہ بھی ہے۔
آج سے 2 ستمبر تک اسلام آباد اور راولپنڈی میں موسلا دھار بارشیں متوقع ہیں۔ وسطی اور جنوبی پنجاب کے اضلاع، جن میں ملتان، ڈیرہ غازی خان، راجن پور، لیہ، بھکر، ساہیوال، بہاولپور، بہاولنگر اور رحیم یار خان شامل ہیں، میں آج سے 31 اگست تک بارشیں ہونے کا امکان ہے۔
پنجاب کے شمالی اور شمال مشرقی اضلاع، مثلاً اٹک، جہلم، چکوال، لاہور، گوجرانوالہ، سیالکوٹ، گجرات، نارووال، حافظ آباد اور منڈی بہاؤالدین میں 30 اور 31 اگست کو شدید بارشیں ہو سکتی ہیں۔
خیبرپختونخوا میں آج سے 31 اگست تک مختلف اضلاع میں بارشیں متوقع ہیں جبکہ ملاکنڈ اور ہزارہ ڈویژن میں لینڈ سلائیڈنگ کا خطرہ ہے۔
چترال، دیر، سوات، بونیر، مانسہرہ، ایبٹ آباد، پشاور، نوشہرہ، مردان، ڈیرہ اسماعیل خان، ٹانک، کوہاٹ اور بنوں میں بارشیں ہو سکتی ہیں۔
آزاد کشمیر کے اضلاع مظفرآباد، باغ، حویلی، کوٹلی، میرپور اور بھمبر میں بھی 2 ستمبر تک بارشوں کا سلسلہ جاری رہنے کی پیشگوئی ہے۔ گلگت بلتستان میں بھی بارشوں کے ساتھ لینڈ سلائیڈنگ کے خدشات ظاہر کیے گئے ہیں۔
نیشنل ڈیزاسٹر مینجمنٹ اتھارٹی کے مطابق کراچی میں کل سے بارشیں شروع ہونے کا امکان ہے اور شہری علاقوں میں اربن فلڈنگ کا خطرہ موجود ہے۔
سندھ کے دیگر اضلاع مثلاً ٹھٹہ، سجاول، بدین اور تھرپارکر میں 30 اگست سے 2 ستمبر تک بارشیں ہوں گی۔ حیدرآباد، دادو، سکھر، گھوٹکی، لاڑکانہ، جیکب آباد اور کشمور میں بھی 30 اگست سے یکم ستمبر کے دوران موسلا دھار بارشوں کی پیشگوئی کی گئی ہے۔
