پاکستان میں رواں سال کے دوسرے مکمل چاند گرہن کا نظارہ کیا جاسکے گا۔
محکمہ موسمیات کے مطابق رواں سال کا دوسرا مکمل چاند گرہن 7 اور 8 ستمبر کی درمیانی شب ہوگا جسے پاکستان سمیت یورپ، ایشیا، آسٹریلیا، افریقا، شمالی اور جنوبی امریکا میں دیکھا جا سکے گا۔
پاکستانی وقت کے مطابق چاند کی روشنی 7 ستمبر رات 8 بج کر 28 منٹ پر مدہم ہونا شروع ہوگی، جزوی گرہن 9 بج کر 27 منٹ پر شروع ہوگا۔
مکمل گرہن 10 بج کر 31 منٹ پر لگے گا۔ گرہن اپنے عروج پر 11 بج کر 12 منٹ پر ہوگا، مکمل گرہن 11 بج کر 53 منٹ پر ختم ہوگا۔
اس کے بعد جزوی گرہن 12 بج کر 57 منٹ پر ختم ہوگا اور رات ایک بج کر 55 منٹ پر چاند گرہن مکمل طور پر اختتام پذیر ہوگا۔
مزید بتایا گیا ہے کہ رواں سال کا دوسرا اور آخری جزوی سورج گرہن 21 اور 22 ستمبر کو ہوگا، جو آسٹریلیا کے جنوبی حصے، بحرالکاہل، بحرِ اوقیانوس اور انٹارکٹیکا میں دیکھا جا سکے گا، تاہم پاکستان میں اس کا مشاہدہ ممکن نہیں ہوگا۔
