وزیراعظم محمد شہباز شریف نے عوامی جمہوریہ چین کے وزیراعظم لی چیانگ سے ملاقات کی، جس میں پاکستان اور چین کے درمیان ہمہ جہت تزویراتی تعاون پر مبنی شراکت داری کو مزید مضبوط بنانے کے عزم کا اعادہ کیا گیا۔
وزیراعظم آفس کے میڈیا ونگ کے مطابق وزیراعظم شہباز شریف نے چین کی قیادت اور عوام کا پاکستان کی علاقائی سالمیت خودمختاری اور سماجی و اقتصادی ترقی کے لئے مسلسل حمایت پر شکریہ ادا کیا۔
انہوں نے کہا کہ پاکستان میں حکومت کی اصلاحات کے مثبت نتائج صرف چین کی حمایت سے ممکن ہوئے ہیں۔ وزیراعظم نے جلد ہی چینی کیپٹل مارکیٹ میں پانڈا بانڈز کے اجرا کے پاکستان کے ارادے کا اظہار بھی کیا۔
صدر شی جن پنگ اور وزیراعظم شہباز شریف کے درمیان دو ستمبر کو ہونے والی ملاقات میں طے پانے والے اتفاق رائے کی بنیاد پر دونوں وزرائے اعظم نے مشترکہ ایکشن پلان 2024 تا 2029 پر دستخط کو تعلقات کے استحکام میں اہم قدم قرار دیا۔
وزیراعظم نے کہا کہ گزشتہ دہائی میں صدر شی جن پنگ کے بیلٹ اینڈ روڈ انیشی ایٹو کے تحت سی پیک نے پاکستان کی ترقی میں بنیادی کردار ادا کیا۔
Held a warm & most productive meeting with Premier Li Qiang in Beijing today.
— Shehbaz Sharif (@CMShehbaz) September 4, 2025
We reaffirmed our shared resolve to further strengthen the iron-clad, All-Weather Pakistan-China Strategic Cooperative Partnership.
We also agreed to advance our cooperation in IT, agriculture,… pic.twitter.com/gNTUHrCokf
شہباز شریف نے قراقرم ہائی وے کی توسیع ریلوے کی لائن ون کی از سر نو تعمیر اور گوادر پورٹ کے جلد فعال ہونے کی ضرورت پر زور دیا۔
دونوں ممالک نے سرمایہ کاری اور بزنس ٹو بزنس تعاون کے فروغ پر اتفاق کیا۔ بیجنگ میں سرمایہ کاری کانفرنس منعقد ہو رہی ہے، جس میں پاکستان کی 300 اور چین کی 500 کمپنیاں شریک ہیں۔ زراعت کان کنی معدنیات ٹیکسٹائل صنعت اور آئی ٹی کو ترجیحی شعبے قرار دیا۔
مزید پڑھیں: کم جونگ ان کی پیوٹن سے ملاقات، شمالی کورین رہنما کا روسی صدر کی ’مکمل حمایت‘ کا اعلان
وزیراعظم شہباز شریف نے چینی صدر کے گلوبل گورننس انیشی ایٹو گلوبل ڈویلپمنٹ انیشی ایٹو گلوبل سکیورٹی انیشی ایٹو اور گلوبل سولائزیشن انیشی ایٹو کے لئے پاکستان کی حمایت کا اعادہ کیا۔ ملاقات کے بعد چینی وزیراعظم نے وزیراعظم پاکستان کے اعزاز میں ظہرانہ دیا۔
واضح رہے کہ پاکستان اور چین آئندہ سال سفارتی تعلقات کے قیام کی پچھترویں سالگرہ منائیں گے۔ دونوں ممالک نے اس موقع پر سی پیک کے دوسرے مرحلے اور دیگر شعبوں میں تعاون کے فروغ کے لیے معاہدوں پر دستخط کی تقریب میں بھی شرکت کی۔
