الیکشن کمیشن نے بارشوں اور سیلاب کی تباہ کاریوں کے باعث پنجاب میں قومی اور صوبائی اسمبلی کے ضمنی انتخابات ملتوی کرنے کا اعلان کر دیا۔
الیکشن کمیشن کی جانب سے جاری کردہ جاری کردہ آرڈر کے مطابق قومی اسمبلی کے حلقے این اے 66 وزیرآباد، این اے 96 فیصل آباد، این اے 104 فیصل آباد، این اے 129 لاہور اور این اے 143 ساہیوال میں ضمنی الیکشن ملتوی کیے گئے ہیں۔
اسی طرح صوبائی اسمبلی کے حلقے پی پی 73 سرگودھا، پی پی 87 میانوالی، پی پی 98 فیصل آباد اور پی پی 203 ساہیوال میں بھی انتخابات ملتوی ہوگئے ہیں۔
الیکشن کمیشن کا کہنا ہے کہ سیلاب سے پنجاب میں مواصلات کا نظام درہم برہم ہوچکا ہے، سرکاری و نجی انفراسٹرکچر کو شدید نقصان پہنچا ہے اور سرکاری اسکولوں کی عمارتیں، جو پولنگ اسٹیشن کے طور پر استعمال ہوتی تھیں وہ بھی متاثر ہوئی ہیں۔
کمیشن کے مطابق سول انتظامیہ، قانون نافذ کرنے والے ادارے اور پولنگ اسٹاف سیلاب ریلیف آپریشنز میں مصروف ہیں، جس کے باعث الیکشن ڈیوٹی سر انجام دینا ممکن نہیں۔ پنجاب حکومت نے بھی ضمنی الیکشن ملتوی کرنے کی سفارش کی تھی۔
الیکشن کمیشن کا مزید کہنا ہے کہ متاثرہ علاقوں کے عوام بے گھر ہیں اور انفراسٹرکچر کی تباہی کے باعث ووٹرز اپنا حقِ رائے دہی استعمال نہیں کر سکیں گے۔ حالات معمول پر آنے کے بعد انتخابی عمل دوبارہ شروع کیا جائے گا۔
