پاکستان میں آج شام رواں سال کا دوسرا ’بلڈ مون‘ کیسے دیکھ سکتے ہیں؟

پاکستان سمیت دنیا کے کئی ممالک میں آج رات رواں سال کا دوسرا مکمل چاند گرہن دیکھا جا سکے گا۔

یہ فلکیاتی منظر امریکا، بھارت، بنگلہ دیش، چین، جاپان اور سعودی عرب سمیت مختلف خطوں میں نظر آئے گا۔

محکمہ موسمیات کے مطابق پاکستان میں یہ گرہن واضح طور پر دیکھا جا سکے گا، تاہم کراچی اور جنوبی حصوں میں بادلوں کے باعث عوام کو اس کا مشاہدہ کرنے میں مشکلات پیش آسکتی ہیں۔ چاند کی روشنی رات 8 بجکر 28 منٹ پر مدھم ہونا شروع ہوگی، 9 بجکر 27 منٹ پر جزوی گرہن اور 10 بجکر 31 منٹ پر مکمل گرہن ہوگا۔

یہ منظر رات 11 بجکر 12 منٹ پر اپنے عروج پر پہنچے گا اور 8 ستمبر کی رات ایک بجکر 55 منٹ پر ختم ہوگا۔

ماہرین کے مطابق مکمل گرہن کے دوران چاند سرخی مائل نظر آئے گا جسے “بلڈ مون” کہا جاتا ہے، یہ فلکیات کے شوقین افراد کے لیے ایک یادگار لمحہ ہوگا۔

اس کے بعد 21 اور 22 ستمبر کو سال کا دوسرا اور آخری جزوی سورج گرہن ہوگا، تاہم پاکستان میں اس کا مشاہدہ نہیں کیا جا سکے گا۔