اسلام آباد میں پاکستان تحریک انصاف نے وزیراعلیٰ گلگت بلتستان حاجی گلبر خان سمیت 12 اراکین اسمبلی کی بنیادی رکنیت ختم کر دی۔
ایڈیشنل سیکرٹری جنرل پی ٹی آئی نے منحرف اراکین جی بی اسمبلی کے خلاف نوٹیفکیشن جاری کیا جبکہ پارٹی کے سوشل میڈیا پیج پر بھی ان اراکین کی تصاویر شیئر کی گئیں۔
پی ٹی آئی کے نوٹیفکیشن کے مطابق پارٹی پالیسی کی خلاف ورزی، فارورڈ بلاک بنانے اور پارٹی کے خلاف ووٹنگ کے الزامات پر وزیراعلیٰ گلگت بلتستان حاجی گلبر خان، شمس الحق لون، راجہ اعظم، عبدالحمید، امجد زیدی، حاجی شاہ بیگ، ثریا زمان، راجہ ناصر مقپون، مشتاق احمد، دلشاد بانو اور فضل رحیم کی بنیادی رکنیت ختم کر دی گئی۔
دوسری جانب سابق گورنر گلگت بلتستان راجہ جلال حسین مقپون کو شوکاز نوٹس جاری کیا گیا ہے۔
ساتھ ہی گلگت بلتستان کے اراکین کو پارٹی کا نام، جھنڈا اور عہدہ استعمال کرنے سے روک دیا گیا ہے۔
