وفاقی حکومت سے مطالبہ ہے کہ زرعی ایمرجنسی نافذ کی جائے اور سیلاب سے متاثرہ کسانوں کو بیج اور کھاد مفت فراہم کی جائے، بلاول بھٹو

چیئرمین پاکستان پیپلز پارٹی بلاول بھٹو زرداری نے کہا ہے کہ وفاقی حکومت سے مطالبہ ہے کہ سیلاب کے شروع ہونے سے لے کر ختم ہونے تک کسانوں کے بجلی کے بل معاف کیے جائیں، زرعی ایمرجنسی نافذ کی جائے اور سیلاب سے متاثرہ کسانوں کو بیج اور کھاد مفت فراہم کی جائے۔

بلاول بھٹو زرداری نے مظفرگڑھ اور ملتان کے سیلاب زدہ علاقوں کا دورہ کیا اور اس موقع پر سیلاب متاثرین اور میڈیا کے نمائندوں سے گفتگو کی۔ انہوں نے کہا کہ اس وقت سیلاب سے سب سے زیادہ نقصان پنجاب میں ہوا ہے، سیلاب نے گلگت، خیبر پختون خوا اور پنجاب کے کئی علاقوں میں تباہی مچا دی ہے۔

چیئرمین پاکستان پیپلز پارٹی کا کہنا ہے کہ ہم آج جنوبی پنجاب میں موجود ہیں، جہاں سیلاب نے تباہی مچائی ہے، یہاں کے لوگ شدید مشکلات کا شکار ہیں، خصوصاً کسان سب سے زیادہ متاثر ہوئے ہیں۔

انہوں نے کہا کہ پاکستان کی عوام مشکل سے گزر رہی ہے۔ معیشت پر بہت زیادہ اثر پڑا ہے۔ ہم اس مشکل وقت میں عوام کے ساتھ ہیں۔

بلاول بھٹو زرداری کا کہنا تھا کہ وفاقی حکومت سے مطالبہ ہے کہ زرعی ایمرجنسی نافذ کی جائے اور سیلاب سے متاثرہ کسانوں کو بیج اور کھاد مفت فراہم کی جائے۔ سیلاب کے شروع ہونے سے لے کر ختم ہونے تک کسانوں کے بجلی کے بل معاف کئے جائیں۔

انہوں نے کہا کہ اس سیلاب سے نمٹنے کے لیے وفاق کو صوبائی حکومت سے مل کر متاثرین کی مدد کرنی ہوگی۔ وفاقی حکومت کو زرعی ایمرجنسی کا اعلان کرنا چائیے کیونکہ زرعی ایمرجنسی کے ذریعے ہم معیشت کو بچا سکتے ہیں۔کسی بھی آفت سے نکلنے کے تین مرحلے ہیں، پہلا رسیکیو، دوسرا ریلیف، تیسرا اور سب سے اہم تعمیرنو اور بحالی ہے۔

چیئرمین پیپلز پارٹی نے کہا کہ انہوں نے وزیراعظم سے اپیل کی ہے کہ سیلاب متاثرین کی مدد بی آئی ایس پی سے کی جائے۔ وفاقی حکومت کو چاہیے کہ وہ اپنی سپورٹ پرائس پالیسی پر نظرثانی کرے، جس طرح سندھ اور بلوچستان نے 2022ءکے سیلاب کے بعد متاثرین کے لیے گھروں کی تعمیر کی جا رہی ہے۔ اسی طرز پر پنجاب حکومت اور وفاقی حکومت بھی منصوبہ بنائے۔

انہوں نے کہا کہ وزیرخارجہ کو باضابطہ طور پر عالمی سطح پر مدد کی اپیل کرنی چاہیے۔ انہوں نے کہا کہ اس سیلاب کا مقابلہ کوئی ایک حکومت نہیں کر سکتی۔ ہمیں اپنے دوستوں سے عالمی سطح پر مدد کی درخواست کرنی چاہیے۔

مزید پڑھیں:

بلاول بھٹو کا کہنا تھا کہ یہ وقت سیاسی بیان بازی کا نہیں بلکہ متحد ہونے کا ہے۔ میڈیا نے بہت اچھے انداز میں مثبت رپورٹنگ کی ہے اور اس امید کا اظہار کیا کہ سندھ میں بھی میڈیا اسی طرح کرے گی۔ ہمیں قدرتی آفات سے نمٹنے کے لئے مستقبل کی پلاننگ کرنی ہوگی۔

انہوں نے کہا کہ وزیراعظم نے انہیں یقین دہانی کرائی ہے کہ وہ بی آئی ایس پی کے ذریعے متاثرین کی مددکریں گے کیونکہ یہ ادارجاتی مدد کا سب سے بہتر طریقہ ہے۔ یہ پی پی پی کا فلسفہ ہے کہ ہر مشکل میں عوام کا ساتھ دیا جائے۔

انہوں نے مظفرگڑھ اور ملتان میں پارٹی کے نمائندوں کی جانب سے متاثرین کی مدد کرنے پر ان کی تعریف کی اور پارٹی کے ہر نمائندےا ور کارکن کو ہدایت کی کہ وہ سیلاب زدگان کی مدد کریں۔