وفاقی حکومت نے سیلاب متاثرین کے لیے بجلی بلوں میں بڑا ریلیف دینے کا فیصلہ کیا ہے۔
حکومت کی جانب سے یہ فیصلہ کیا گیا ہے کہ بجلی کے بلوں پر جنرل سیلز ٹیکس، ایف سی سرچارج اور فکس چارجز ختم کرنے پر غور کیا جا رہا ہے۔
اس کے علاوہ فیول پرائس ایڈجسٹمنٹ پر جنرل سیلز ٹیکس اور ایکسائز ڈیوٹی کے خاتمے کی بھی تجویز ہے۔ بجلی بلوں پر انکم ٹیکس، فاضل ٹیکس اور ریٹیلر سیلز ٹیکس کا خاتمہ بھی زیر غور ہے۔
وفاقی وزیر رانا تنویر حسین نے کہا کہ سیلاب متاثرین کے بجلی بلوں پر ٹیکسز کے خاتمے کے لیے کام کیا جا رہا ہے اور فی الفور سیلاب متاثرین کے ٹیکس معاف کیے جائیں گے۔
وزیر موصوف نے یہ بھی بتایا کہ بجلی بلوں میں ریلیف وفاقی حکومت دے گی جبکہ لینڈ ریونیو کی معافی صوبائی حکومت کرے گی۔
رانا تنویر حسین نے مزید کہا کہ سیلاب زدہ علاقوں میں بجلی کے اضافی بلوں کا نوٹس لیا جائے گا۔ یہ وہ بل ہیں جو پہلے ہی پرنٹ ہو چکے ہیں۔
حکومت نے فصلوں اور جانوروں کے نقصان کے ازالے کے لیے کسانوں کے لیے پیکیج لانے کا بھی فیصلہ کیا ہے۔ وزیر موصوف نے کہا کہ سیلاب متاثرہ علاقوں کا سروے مکمل ہوتے ہی کسان پیکیج کا اعلان کیا جائے گا۔
رانا تنویر حسین کے مطابق سیلاب سے متاثرہ علاقوں کا سروے ہفتے 10 روز میں مکمل کر لیا جائے گا۔ سیلاب سے متاثرہ علاقوں میں فصلوں کے نقصان کا ابتدائی ڈیٹا بھی مرتب کر لیا گیا ہے۔
وزیر نے کہا کہ سیلاب کے دوران ہر فصل کا ایک سے تین فیصد تک نقصان ہوا ہے۔ چاول کی فصل سب سے زیادہ متاثر ہوئی ہے اور گوجرانوالہ ڈویژن میں فصلوں کا 18 فیصد تک نقصان ہوا ہے۔
واضع رہے کہ حکومت کی جانب سے سیلاب متاثرین کی مدد کے لیے متعدد اقدامات کیے جا رہے ہیں جن میں بجلی بلوں میں ریلیف کے علاوہ کسانوں کے لیے پیکیج بھی شامل ہے۔
سیلاب کے بعد کی صورتحال میں حکومت کی کوشش ہے کہ متاثرین کو جلد از جلد امداد فراہم کی جا سکے۔
