وزیراعظم شہباز شریف نے سیلاب متاثرین کے لیے بڑا ریلیف پیکج پیش کرتے ہوئے گھریلو صارفین کے اگست کے بجلی بل معاف کرنے کا اعلان کیا ہے۔ انہوں نے کہا ہے کہ حکومت سیلاب متاثرہ علاقوں کی مکمل بحالی تک چین سے نہیں بیٹھے گی۔
قوم سے اپنے مختصر خطاب میں شہباز شریف کا کہنا تھا کہ حکومت کو سیلاب متاثرین کی مشکلات کا بخوبی اندازہ ہے، اسی لیے ان کے بجلی کے بل وفاقی حکومت اپنے وسائل سے ادا کرے گی، یہ کوئی احسان نہیں بلکہ متاثرین کا حق ہے۔
انہوں نے کہا کہ جو گھریلو صارفین اگست کا بل پہلے ہی ادا کرچکے ہیں، انہیں یہ رقم آئندہ ماہ کے بلوں میں ایڈجسٹ کر دی جائے گی۔ اس سلسلے میں متعلقہ بجلی تقسیم کار کمپنیوں کو فوری ہدایات بھی جاری کر دی گئی ہیں۔
شہباز شریف نے مزید کہا کہ متاثرہ علاقوں میں زرعی، کمرشل اور صنعتی صارفین کے بجلی بلوں کا تفصیلی تخمینہ لگایا جا رہا ہے، جب کہ ان بلوں کی وصولی فی الحال مؤخر کر دی گئی ہے۔ اگر تخمینہ زیادہ نکلا تو حکومت ان شعبوں کے لیے مزید ریلیف اقدامات پر غور کرے گی۔
ان کا کہنا تھا کہ سیلاب سے تباہ ہونے والے علاقے کھلے آسمان تلے بیٹھے لوگوں کی کربناک صورتحال کی عکاسی کر رہے ہیں۔ ایسے حالات میں یہ ایک معمولی سی کوشش ہے، جس کا مقصد متاثرین کی مشکلات میں کمی لانا ہے۔
شہباز شریف نے عزم ظاہر کیا کہ حکومت سیلاب متاثرہ علاقوں کی مکمل بحالی تک چین سے نہیں بیٹھے گی، جب تک متاثرہ ہر شخص کو دوبارہ آباد نہ کر دیں، ہم سکون سے نہیں بیٹھیں گے، اللہ تعالیٰ ہماری مدد فرمائے۔
