انڈیا کی کرکٹ ٹیم نے کرکٹ جیسے جینٹلمین گیم کو داغدار کر دیا۔ ایشیا کپ کے میچ کے بعد انڈیا کے کھلاڑیوں نے پاکستان کے کھلاڑیوں سے ہاتھ ملانے سے انکار کر دیا۔
ڈان نیوز کے مطابق ٹاس کے وقت بھی انڈیا کے کپتان سوریا کمار یادیو نے پاکستان کے کپتان سلمان علی آغا سے ہاتھ نہیں ملایا تھا۔
میچ ختم ہونے کے بعد جب انڈیا نے پاکستان کو شکست دی تو کپتان سوریا کمار یادیو (47 رنز ناٹ آؤٹ) اور شیوم دھوبے (10 رنز) پاکستانی کھلاڑیوں سے ہاتھ ملائے بغیر ہی میدان سے باہر چلے گئے۔
اس کے بعد سوریا کمار یادیو نے باقی انڈین کھلاڑیوں کو بھی ڈریسنگ روم میں بُلا لیا، جبکہ پاکستان ٹیم گراؤنڈ میں ہی موجود رہی۔
ذرائع کے مطابق پاکستان کے کپتان نے اس رویے پر احتجاج کرتے ہوئے پوسٹ میچ پریزنٹیشن میں شرکت بھی نہیں کی۔
سوریا کمار یادیو نے کھیل میں سیاست شامل کرتے ہوئے پاکستان کے خلاف جیت کو پہلگام واقعے کے نام کر دیا۔ انہوں نے کہا: “آج کی جیت پہلگام واقعے کے نام، یہ بھارتی فوج کے لیے تحفہ ہے۔”
یاد رہے کہ آئی سی سی کے قوانین کے مطابق کرکٹرز کو سیاست، مذہب یا زبان کے حوالے سے بیانات دینے کی اجازت نہیں ہوتی۔
ایشیا کپ کے چھٹے میچ میں انڈیا نے پاکستان کو 7 وکٹوں سے شکست دی۔
پاکستان وائٹ بال ٹیم کے ہیڈ کو چ مائیک ہیسن نے انڈین ٹیم کے دوران میچ اور اختتام پر رویے کو انہتائی مایوس کن قرار دیا ہے۔
ایشیا کپ کے چھٹے میچ کے بعد پوسٹ میچ پریس کانفرنس میں گفتگو کرتے ہوئے پاکستان ٹیم کے ہیڈ کوچ مائیک ہیسن نے کہا کہ ہم میچ کے بعد انڈین کھلاڑیوں سے ہاتھ ملانے کے لیے تیار تھے۔
ہیڈ کوچ نے مزید کہا کہ بھارتی کرکٹ ٹیم پاکستانی کھلاڑیوں سے ہاتھ ملائے بغیر ڈریسنگ روم چلی جو مایوس کن ہے، انڈین ٹیم کے اس رویے پر ہم نےکپتان سلمان علی آغا کو اختتامی تقریب میں نہیں بھیجا۔
دریں اثنا، پاکستان ٹیم انتظامیہ نے انٹرنیشنل کرکٹ کونسل (آئی سی سی) میچ ریفری کو انڈین کھلاڑیوں کے رویے کی شکایت کر بھی کر دی، جس میں انڈین کپتان اور کھلاڑیوں کے رویے کی تفصیلات فراہم کی گئی ہیں۔
واضح رہے کہ پاک-انڈیا میچ کے اختتام پر جب انڈیا نے پاکستان کے خلاف فتح حاصل کی تو 47 رنز پر ناٹ آؤٹ اننگز کھیلنے والے انڈین ٹیم کے کپتان سوریا کمار یادیو اور 10 رنز پر کھیلنے والے شیوم دھوبے پاکستانی کھلاڑیوں سے ہاتھ ملائے بغیر ہی میدان سے باہر چلے گئےتھے۔
سوریا کمار یادیو نے میدان سے باہر پہنچتے ہی باقی انڈین کھلاڑیوں کو بھی ڈریسنگ میں بُلا لیا، اس دوران پاکستان ٹیم میدان کے اندر ہی موجود رہی۔
قبل ازیں، انڈین کرکٹ ٹیم کےکپتان سوریا کمار یادیو نے ٹاس کے موقع پر بھی پاکستانی ٹیم کے کپتان سلمان علی آغا سے ہاتھ نہیں ملایا تھا۔
