اسرائیلی افواج نے غزہ شہر میں کم از کم 30 رہائشی عمارتیں تباہ کر دیں اور ہزاروں افراد کو اپنے گھروں سے بے دخل کر دیا۔
فلسطینی حکام کے مطابق یہ کارروائی ایسے وقت میں کی گئی جب امریکی وزیر خارجہ مارکو روبیو اتوار کو خطے کے مستقبل پر بات کرنے کے لیے پہنچے۔
اسرائیل کا کہنا ہے کہ وہ شہر پر قبضہ کرنے کا ارادہ رکھتا ہے، جہاں تقریباً ایک ملین فلسطینی پناہ لیے ہوئے ہیں۔
اسرائیل کے مطابق یہ اقدام حماس کو ختم کرنے کی حکمتِ عملی کا حصہ ہے، اور اسی مقصد کے لیے اس نے حالیہ دنوں میں حملوں میں شدت پیدا کی ہے۔
اسرائیلی فضائی حملے میں منگل کو دوحہ میں حماس کی سیاسی قیادت کو نشانہ بنایا گیا جس پر عالمی سطح پر شدید مذمت سامنے آئی۔
قطر پیر کو ایک ہنگامی عرب-اسلامی سربراہی اجلاس کی میزبانی کرے گا تاکہ آئندہ اقدامات پر غور کیا جا سکے۔
روبیو نے کہا کہ واشنگٹن کا مقصد 48 یرغمالیوں کی رہائی پر بات کرنا ہے جو اب بھی غزہ میں حماس کی قید میں ہیں، جن میں سے صرف 20 کے زندہ ہونے کا یقین ہے۔
ان کا کہنا تھا کہ جو کچھ ہونا تھا ہو گیا، اب ہم اسرائیلی قیادت سے ملاقات کریں گے اور مستقبل پر بات کریں گے۔” وہ منگل تک اسرائیل میں رہیں گے۔
اسرائیل پہنچنے کے بعد روبیو نے یروشلم میں دیوارِ گریہ کا دورہ کیا، جسے امریکی محکمہ خارجہ نے “یروشلم کو اسرائیل کا ابدی دارالحکومت تسلیم کرنے کی امریکی پالیسی کا اعادہ” قرار دیا۔
یہ وہی پالیسی ہے جسے ڈونلڈ ٹرمپ نے 2017 میں اپنے پہلے دورِ صدارت کے دوران اپنایا تھا اور امریکی سفارتخانہ تل ابیب سے یروشلم منتقل کیا تھا۔
ادھر اقوام متحدہ کے ادارہ برائے فلسطینی پناہ گزین (UNRWA) کے سربراہ فلپ لازرینی نے ایک بیان میں کہا کہ ادارے نے غزہ کے بیچ کیمپ کلینک میں خدمات روک دی ہیں، جو وادی غزہ کے شمال میں واحد طبی سہولت ہے۔
ان کے مطابق غزہ شہر میں پچھلے چار دنوں کے دوران UNRWA کی 10 عمارتیں نشانہ بنی ہیں جبکہ پانی اور صفائی ستھرائی کی سہولیات اب نصف گنجائش پر کام کر رہی ہیں۔
