کراچی میں پولیس کی خفیہ اطلاع پر بڑی کارروائی کی گئی، ایس ایس پی کورنگی طارق نواز کی سربراہی میں ایس ایچ او کورنگی ملک عامر نے کامیاب کاروائی کرتے ہوئے پولیس یونیفارم پہن کر اغواء اور ہاؤس رابری میں ملوث 5 رکنی گینگ کو گرفتار کرلیا۔
کراچی کے علاقے کورنگی میں پولیس نے بڑی کارروائی کرتے ہوئے گینگ کو گرفتار کیا، ملزمان کے قبضے سے اسلحہ برآمد کیا گیا ہے، گرفتار ملزمان میں علی عمران شیخ، وقار اور انیل شامل ہیں، ان کے علاوہ ملزمان میں دھیرج اور فرزوق شاہ بھی شامل ہیں۔
واضح رہے کہ ملزمان نے چھ جنوری کو زمان ٹاؤن میں 16 لاکھ روپے کی ڈکیتی کی تھی، واردات سرکاری ادارے کا یونیفارم پہن کر کی گئی تھی۔ ملزمان نے سال 2021 عیدگاہ کی حدود میں مندر پر فائرنگ کر کے پانچ لاکھ بھتہ وصول کیا تھا۔
08 اگست 2024 کو تاجر سلمان بٹ کو اغوا کیا گیا، مغوی کو حبس بے جا میں رکھ کر 10 لاکھ روپے تاوان وصول کیا گیا تھا۔ سال 2024 میں بھی ہندو شخص کے آئی ٹی سینٹر میں نقب زنی کی واردات کی تھی، شہری کو تین لاکھ روپے وصول کرنے کے بعد چھوڑ دیا گیا تھا۔
اس کے علاوہ سال 2024 میں شنکر کو بلیک میل کر کے دو لاکھ روپے وصول کیے گئے، نومبر 2024 چکرہ گوٹھ گیمنگ شاپ میں حساس ادارے کا اہلکار ظاہر کر کے داخل ہوئے۔ بابر نامی ملازم کو اغوا کیا اور ایک دن حبس بے جا رکھنے کے بعد ریلیز کر دیا۔
گرفتار ملزمان نے انکشاف کیا ہے کہ وہ کراچی کے مختلف علاقوں میں 2025 کی سب سے بڑی واردات کی منصوبہ بندی کر رہے تھے، ملزمان نے انکشاف کیا کہ ان کی ٹیم کی تیاری مکمل تھی۔ ملزمان نے کہا اگر ہم گرفتار نہ ہوتے تو اس واردات میں بھی کامیابی ملتی۔
خیال رہے کہ ملزمان پولیس اور سرکاری اداروں کا یونیفارم پہن کر وائرلیس سیٹ دکھا کر گھروں میں داخل ہوتے تھے، گرفتار ملزمان سے مزید تفتیش کا عمل جاری ہے۔
