منگل کے روز تیونس کے سیکڑوں شہریوں نے ایک اسکول کی دیوار گرنے کے واقعے کے خلاف احتجاج کیا، جس میں تین طالب علم ہلاک ہو گئے تھے۔ یہ واقعہ پیر کو وسطی قصبے مززونا میں پیش آیا اور اس نے عوام میں شدید غصہ پیدا کر دیا۔ مظاہرین نے حکام پر غفلت کے الزامات عائد کیے اور احتساب کا مطالبہ کیا۔
سول ڈیفنس کے مطابق ایک پرانی اور خستہ حال دیوار گرنے سے تین نوجوان طلبہ جاں بحق ہو گئے، جو اپنے بیچلوریٹ امتحانات کی تیاری کر رہے تھے، جبکہ دو دیگر طلبہ شدید زخمی ہو گئے۔
مظاہرین کا کہنا تھا کہ یہ سانحہ تیونس میں بڑھتے ہوئے معاشی اور سماجی مسائل اور عوامی خدمات کی خراب حالت کا نتیجہ ہے۔ ان کے مطابق ملک میں پرانے اور بوسیدہ ڈھانچوں کی مناسب دیکھ بھال نہیں کی جا رہی، جو ایسے المناک واقعات کا سبب بن رہی ہے۔
عینی شاہدین نے بتایا کہ مظاہرین نے ٹائروں کو آگ لگائی، سڑکیں بند کر دیں اور ایک سرکاری گاڑی کو نقصان پہنچایا۔ مززونا میں تمام دکانیں اور اسکول بند کر دیے گئے۔ مظاہرین نیشنل گارڈ ہیڈ کوارٹر کے قریب جمع ہوئے اور انہوں نے معاشرتی ناانصافی کے خلاف نعرے لگائے اور ذمہ دار اہلکاروں کی برطرفی کا مطالبہ کیا۔
دارالحکومت تیونس میں بھی کئی نوجوانوں نے حکومت مخالف مظاہروں میں حصہ لیا، سانحے کے متاثرین سے یکجہتی کا اظہار کیا اور حکومت سے مستعفی ہونے کا مطالبہ کیا۔
حکام نے اس واقعے کی تحقیقات شروع کر دی ہیں۔ عدالتی ترجمان نے تصدیق کی ہے کہ اسکول کے پرنسپل کو گرفتار کر لیا گیا ہے۔
