یمن کے ایران نواز حوثی باغیوں نے ہ اسرائیل پر ایک بیلسٹک میزائل داغنے کا دعویٰ کیا ہے۔ باغیوں کے مطابق یہ حملہ غزہ جنگ کے دوران فلسطینیوں کے ساتھ اسرائیلی رویے کے خلاف ردعمل کے طور پر کیا گیا۔
حوثی عسکری ترجمان یحییٰ سریع نے ایک بیان میں کہا ہے کہ حوثی فورسز نے مقبوضہ علاقے بیرشیوا میں ایک حساس اسرائیلی ہدف پر ذو الفقار بیلسٹک میزائل سے حملہ کیا۔ ترجمان کے مطابق یہ کارروائی غزہ میں شہریوں کے خلاف صہیونی دشمن کے جرائم کے جواب میں کی گئی۔
اسرائیلی فوج کے مطابق حملے سے قبل متعدد علاقوں میں سائرن بجائے گئے، تاہم بعد ازاں فوج نے اعلان کیا کہ میزائل کو کامیابی سے روکا جانا ممکن ہے۔
یہ حملہ ایران اور اسرائیل کے درمیان جنگ کے بعد طے پانے والے سیز فائر کے بعد حوثیوں کی جانب سے کیا جانے والا پہلا اعلان کردہ حملہ ہے۔
حوثی باغیوں نے اکتوبر 2023 میں حماس کے اسرائیل پر حملے کے بعد اسرائیل کے خلاف ڈرون اور میزائل حملے شروع کیے تھے۔ مارچ میں ختم ہونے والے سیز فائر کے دوران ان حملوں میں وقفہ آیا، تاہم بعد ازاں اسرائیل کی کارروائیوں کے دوبارہ آغاز کے ساتھ حوثیوں نے بھی حملے بحال کیے۔
حوثی ترجمان نے کہا ہے کہ جب تک غزہ پر حملے بند نہیں ہوتے اور محاصرہ ختم نہیں کیا جاتا، کارروائیاں جاری رہیں گی۔
یاد رہے کہ اسرائیل کی جانب سے یمن میں کئی جوابی فضائی کارروائیاں کی گئی ہیں، جن میں حوثیوں کے زیرِ قبضہ بندرگاہوں اور صنعاء ایئرپورٹ کو نشانہ بنایا گیا۔
