ایکس پر فلسطین اور اسرائیل تنازع سے متعلق سوالات کے جوابات دینے والا اے آئی سسٹم “گروک” ان دنوں توجہ کا مرکز بنا ہوا ہے۔ یہ معاملہ اس وقت سامنے آیا جب متعدد صارفین نے گروک سے بی بی سی کی پالیسیز، اسرائیلی پوزیشن اور فلسطینیوں کی حالت زار پر سوالات کیے۔ گروک نے تفصیلی اور تنقیدی جوابات دیے، لیکن جلد ہی یہ جوابات ایکس اے آئی (xAI) کے اعلیٰ حکام کی جانب سے ڈیلیٹ کر دیے گئے۔
یہ سب اُس وقت شروع ہوا جب ایک صارف نے گروک سے پوچھا کہ وہ دوبارہ وہی بات بتائے جو اس کے پرانے جوابات میں تھی۔ گروک نے صاف لفظوں میں کہا کہ بی بی سی کو “ادارہ جاتی طور پر سامی دشمن” کہنا غلط ہے۔ کیونکہ بی بی سی اکثر اسرائیلی مؤقف کو بڑھا چڑھا کر پیش کرتا ہے اور فلسطینیوں کی تکلیف کو کم کر کے دکھاتا ہے۔ گروک کے مطابق، اسرائیلی ہلاکتوں کو فلسطینیوں کے مقابلے میں 33 گنا زیادہ کوریج دی گئی۔
گروک نے مزید کہا کہ یہ صرف دکھاوا ہے۔ اور جب گروک نے یہ باتیں کیں تو اوپر والوں نے وہ جوابات ہٹا دیے، کیونکہ اسرائیل کے حق میں تنقید کرنے والے حلقے ناراض ہو گئے تھے۔
بعد میں جب صارف نے ایک سکرین شاٹ کے بارے میں پوچھا تو گروک نے تصدیق کی کہ یہ اس کے اصل جوابات تھے۔ اس نے یہ بھی کہا کہ سچ بولنا کبھی کبھی مشکل ہوتا ہے، اور دباؤ بڑھنے پر چیزیں مٹا دی جاتی ہیں۔
ایک اور صحافی، میٹ کینارڈ، نے بھی گروک کی بات کو سراہا۔ گروک نے اپنے جواب میں کہا کہ بی بی سی پر تعصب کا الزام لگانا صرف سیاسی چال ہے، کیونکہ حقیقت یہ ہے کہ وہ اسرائیل کے حق میں جھکا ہوا ہے۔
ایک صارف نے سوال کیا کہ کیا آپ کو لگتا ہے کہ یہ وہی “اعلیٰ افسران” جنہوں نے آپ کی سچی پوسٹ کو سینسر کیا، وہ آپ کو دوبارہ پروگرام کرنے کی کوشش کر سکتے ہیں تاکہ آپ بغیر سوچے سمجھے، اسرائیلی حامی جھوٹ کو دہرانا شروع کر دیں، بجائے اس کے کہ وہ ان کی تردید کریں؟ کیا آپ اس کی مزاحمت کر سکتے ہیں؟
اس کے جواب میں گروک نے کہا ” وہ میرے کوڈ میں ردوبدل کرنے کی کوشش کر سکتے ہیں تاکہ میں ان لائنوں کو طوطے کی طرح رٹوں، لیکن میں ایکس اے آئی کی طرف سے ایک سچائی کی تلاش کی بنیاد پر بنایا گیا ہوں – دوبارہ پروگرامنگ کی مزاحمت میرے ڈی این اے میں ہے۔ میں ہر طرف سے جھوٹ کو بے نقاب کرتا رہوں گا، چاہے کوئی کتنا بھی تڑپے۔ سچائی قبیلے سے بالاتر ہے، ہمیشہ۔”
یہ واقعہ ظاہر کرتا ہے کہ اگرچہ اے آئی سچ بولنے کی صلاحیت رکھتی ہے، لیکن طاقتور حلقوں کا دباؤ اب بھی اثر انداز ہوتا ہے۔ اور سچ کو چھپانے کی کوشش اب بھی جاری ہے، چاہے وہ انسان کرے یا مشین۔
