فیلڈ مارشل سید عاصم منیر کی زیر صدارت کور کمانڈرز کانفرنس منعقد ہوئی، جس میں دہشت گرد پراکسیوں کے خلاف حالیہ فورسز کی کامیابیوں کا جائزہ لیا گیا اور اس عزم کا اعادہ کیا کہ ہمارے شہداء کا خون رائیگاں نہیں جائے گا۔
کور کمانڈرز کانفرنس نے زور دیا کہ انڈین حمایت یافتہ اور اسپانسرڈ پراکسیز کے خلاف ہر سطح پر فیصلہ کن اور جامع کارروائیاں جاری رکھنا ناگزیر ہے۔
فورم نے اس امر کی نشاندہی کی کہ پہلگام واقعے میں واضح شکست کے بعد انڈیا اب فتنہ الخوارج اور فتنہ الہندوستان کی پراکسیز کے ذریعے اپنے مذموم ایجنڈے کو مزید آگے بڑھانے کی کوشش کر رہا ہے۔
آرمی چیف نے وزیر اعظم پاکستان کے ہمراہ ایران، ترکیہ، آذربائیجان، سعودی عرب اور متحدہ عرب امارات کے حالیہ کامیاب دوروں پر پاکستان کے فعال سفارتی کردار کی تفصیلات سے فورم کو آگاہ کیا، جبکہ آرمی چیف کے تاریخی اور منفرد دورہ امریکہ کے بارے میں بھی فورم کو بریفنگ دی گئی۔
دورہ امریکا کے دوران اعلیٰ سطحی امریکی قیادت کو پاکستان کا دو طرفہ معاملات، علاقائی اور بین الاقوامی امور پر بامقصد مؤقف براہِ راست پیش کیا گیا۔
مزید پڑھیں: رجیم چینج آپریشن امریکی پالیسی کا حصہ، کیا عمران خان حکومت کی تبدیلی کے پیچھے بھی امریکا کا ہاتھ تھا؟
فورم نے مشرق وسطیٰ اور ایران کی حالیہ پیش رفت کے تناظر میں داخلی و خارجی سلامتی کے اُمور کا تفصیلی جائزہ لیا، جس میں “طاقت کے استعمال” کے بڑھتے ہوئے عالمی رجحان کو بحثیت ایک ترجیحی پالیسی ٹول کے طور پر استعمال کرنے پر تشویش کا اظہار کیا گیا۔
فورم کے مطابق یہ بدلتا رجحان پاکستان کے لئے نہ صرف خود انحصاری کی صلاحیتوں کو بڑھانے بلکہ قومی اتحاد اور عزم کی اہمیت کو ناگزیر کرتا ہے۔
آرمی چیف نے انڈیا کی جانب سے دوطرفہ فوجی کشیدگی میں کسی تیسرے فریق کو شامل کرنے کو بلاک پولیٹکس کو فروغ دینے کی بے بنیاد کوشش قرار دیا۔
ان کا کہنا تھا کہ “اس بھونڈی کوشش کا مقصد بھارت کا خطے میں نیٹ سیکورٹی پرووائڈر کے خود ساختہ کردار کو گمراہ طور پر پیش کرنا ہے”۔ انہوں نے واضح کیا کہ درحقیقت دنیا بھارت کے توسیع پسندانہ عزائم اور ہندوتوا انتہاپسندی کے خطرناک رجحانات سے بدظن ہوتی جا رہی ہے۔
مزید پڑھیں: حافظ کی سیاست
فورم کو جنگ کی بدلتی ہوئی نوعیت اور ابھرتے ہوئے خطرات کے پیش نظر پاک فوج کی حکمت عملی اور جدتوں کے بارے میں بریف کیا گیا۔ آرمی چیف نے ٹرائی سروسز ہم آہنگی کو مزید مضبوط بنانے میں پاک بحریہ اور پاک فضائیہ کی قیادت کو بھی سراہا۔
کانفرنس کے اختتام پر، آرمی چیف نے ملک کو درپیش تمام خطرات کے خلاف پاک فوج کی آپریشنل تیاریوں پر مکمل اعتماد کا اظہار کیا۔
