انٹرنیشنل مانیٹری فنڈ (آئی ایم ایف) نے امید ظاہر کی ہے کہ مشرق وسطیٰ، شمالی افریقہ اور پاکستان میں سال 2025 کے بعد معاشی ترقی میں مزید بہتری آئے گی۔
آئی ایم ایف کے پاکستان میں نمائندے ماہر بینیچی نے اسلام آباد میں سسٹین ایبل ڈیولپمنٹ پالیسی انسٹیٹیوٹ (ایس ڈی پی آئی) کے ایک لیکچر میں پاکستان اور خطے کی معاشی صورتحال اور مستقبل پر روشنی ڈالی۔
ماہر بینیچی نے بتایا کہ پاکستان نے آئی ایم ایف کے ایکسٹینڈڈ فنڈ سہولت پروگرام کے تحت اب تک تسلی بخش کارکردگی دکھائی ہے۔
انہوں نے مئی 2025 میں آئی ایم ایف بورڈ کی جانب سے پاکستان کے پہلے جائزے کی کامیاب تکمیل کو ایک اہم سنگ میل قرار دیا اور کہا کہ ابتدائی اقدامات کی بدولت معاشی استحکام بحال ہوا ہے اور سرمایہ کاروں کا اعتماد بھی بہتر ہوا ہے۔
انہوں نے زور دیا کہ پاکستان کی معیشت کو طویل مدتی طور پر مستحکم بنانے کے لیے بنیادی اصلاحات ضروری ہیں، خاص طور پر ٹیکس نظام کو بہتر بنانا، کاروبار کے لیے آسان ماحول فراہم کرنا، اور نجی شعبے کی سرمایہ کاری کو فروغ دینا۔
ماہر بینیچی نے پاکستان کی ماحولیاتی اصلاحات کی تعریف بھی کی، جو آئی ایم ایف کے ریزیلیئنس اینڈ سسٹین ایبلٹی فیسیلٹی (RSF) کے تحت کی جا رہی ہیں۔
اس پروگرام کا مقصد ان ممالک کی مدد کرنا ہے جو موسمیاتی تبدیلی کے خطرات سے نمٹنا چاہتے ہیں اور ماحولیاتی وعدوں پر عملدرآمد کے خواہاں ہیں۔ RSF اصلاحات کے اہم نکات میں سرکاری سرمایہ کاری کی بہتر منصوبہ بندی، پانی کے وسائل کا مؤثر استعمال، قدرتی آفات سے نمٹنے کے لیے ادارہ جاتی تیاری، اور موسمیاتی معلومات کی دستیابی شامل ہیں۔
بینیچی نے کہا کہ یہ اصلاحات پاکستان کی موسمیاتی مزاحمت کو بہتر بنانے کے ساتھ ساتھ سبز سرمایہ کاری کو بھی فروغ دیں گی اور معیشت کو ایک ماحول دوست راستے پر لے جائیں گی۔
تقریب کے اختتام پر ایس ڈی پی آئی کے ایگزیکٹو ڈائریکٹر ڈاکٹر عابد قیوم سلہری نے آئی ایم ایف نمائندے کا شکریہ ادا کرتے ہوئے کہا کہ پاکستان میں پائیدار ترقی کے لیے عالمی تعاون اور معاشی مکالمہ بہت ضروری ہے۔ اس موقع پر مالی اور زری پالیسی، زرمبادلہ کے ذخائر اور پائیدار ترقی کے موضوعات پر مفید بحث بھی کی گئی۔
