عراق جانے والے پاکستانی زائرین سے متعلق نئے طریقہ کار پر عملدرآمد کے لیے ایران کے دارالحکومت تہران میں سہ ملکی کانفرنس کا انعقاد کیا گیا۔ پاکستان، ایران اور عراق کے وزرائے داخلہ کی سہ ملکی کانفرنس میں ایران اور عراق جانے والے زائرین کی سہولت کے لیے ہر ممکن اقدام پر اتفاق کیا گیا۔
اجلاس میں فیصلہ کیا گیا کہ زائرین کی سہولت کے لیے پاکستان، ایران اور عراق کا مشترکہ ورکنگ گروپ تشکیل دیا جائے گا۔
وفاقی وزیرداخلہ محسن نقوی نے سہ ملکی کانفرنس سے خطاب کرتے ہوئے کہا کہ پاکستان کی درخواست پر زائرین کے مسائل کے حل کے لیے سہ ملکی کانفرنس کے انعقاد پر ایرانی وزیر داخلہ سکندر مومنی کا شکریہ ادا کرتا ہوں۔
انہوں نے کہا کہ عراق اور ایران جانے والے زائرین ہمارے لیے بہت اہم ہیں۔ سہ ملکی کانفرنس سے عراق و ایران جانے والے زائرین کو مزید سہولت ملے گی۔
محسن نقوی نے کہا ہے کہ جنگ میں شاندار فتح پر ایران اور ایرانی وزیر داخلہ کو مبارکباد دیتا ہوں۔ پاکستان نے ایران پر حملے کی کھل کر مذمت کی اور ایران کے حق دفاع کو مکمل طور پر سپورٹ کیا۔
ان کا کہنا تھا کہ جنگ کے دوران پاکستانی عوام ایرانی عوام کے ساتھ کھڑے رہے۔ پاکستان اور ایران بھائی ہیں اور ہمیشہ بھائی رہیں گے۔
وفاقی وزیرِ داخلہ نے کہا ہے کہ وزیر اعظم پاکستان اور دیگر اعلی حکام نے جنگ میں انتہائی متحرک و مثبت کردار ادا کیا۔ جو وہ کر سکتے تھے، انہوں نے وہ بہترین کردار ایران کے لیے ادا کیا۔
انہوں نے کہا کہ پاکستان میں ایران کے سفیر امیری مقدم یہاں موجود ہیں اور یہ اس بات کے گواہ ہیں۔ سب جانتے ہیں کہ اربعین پر لاکھوں زائرین عراق جاتے ہیں۔ عراقی وزیر داخلہ اور وزارت داخلہ جس طرح لاکھوں زائرین کی دیکھ بھال کرتی ہے وہ قابل تحسین ہے۔
ان کا کہنا تھا کہ زائرین کو بہترین طریقے سے ہینڈل کرنے پر عراقی وزارت داخلہ کو سلام پیش کرتے ہیں۔ زائرین کے حوالے سے عراق و ایران کے وزرائے داخلہ کو پاکستان کی جانب سے ہر ممکن مدد کی یقین دہانی کراتے ہیں۔
چیئرمین پی سی بی نے کہا کہ یکم جنوری 2026 کے بعد پاکستانی زائرین انفرادی طور پر عراق نہیں جا سکیں گے، زائرین گروپ آرگنائزرز کے تحت ہی عراق جاسکیں گے۔ زائرین گروپ آرگنائزرز کی رجسٹریشن کا عمل شروع کر دیا گیا ہے۔
انہوں نے کہا کہ آرگنائزرز گروپ عراق جانے والے زائرین کی وطن واپسی کے ذمہ دار ہوں گے۔ صرف وہی لوگ انفرادی طور پر عراق جاسکیں گے جنہیں سفارتخانہ خصوصی ویزا جاری کرے گا۔
محسن نقوی نے کہا کہ گروپ آرگنائزرز کے سسٹم سے غیر قانونی عراق جانے والوں اور زائد قیام کے رجحان کا خاتمہ ہو گا۔ عراق اور ایران بھی پاکستان کے اس نئے نظام کے ساتھ ہیں۔ ہم نے مشترکہ اقدامات سے مل کر غیر قانونی طور پر عراق جانے والوں اور وہاں زائد قیام کرنے والوں کو ہر صورت روکنا ہے۔
انہوں نے کہا کہ پاکستان کے زائرین کی دیکھ بھال پرعراق اور ایران کی حکومتوں کا شکریہ ادا کرتا ہوں۔ لاکھوں زائرین کا خیال رکھنا بہت بڑا چیلنج ہے اور دونوں وزرائے داخلہ یہ ذمہ داری خوش اسلوبی سے ادا کر رہے ہیں۔
وفاقی وزیرِ داخلہ نے کہا کہ ایران کے سپریم لیڈر آیت اللہ خامنہ ای جنگ کے دوران مضبوطی سے کھڑے رہے اور جرات کے ساتھ لیڈ کیا ۔ آیت اللہ خامنہ ای اور ایرانی عوام کو عظیم فتح پر مبارکباد دیتے ہیں۔
واضح رہے کہ ایران کے نائب وزیر داخلہ علی اکبر پور جمشیدیان، ایرانی وزیر داخلہ کے سینئر مشیر نادر یار احمدی، پاکستان میں ایران کے سفیر امیری مقدم، ایران میں پاکستان کے سفیر محمد مدثر ٹیپو، پاکستانی وزارت داخلہ کے سیکرٹری خرم آغا، عراق کی وزارت داخلہ کے اعلی حکام نے بھی سہ ملکی کانفرنس میں شرکت کی۔
