لاہور میں وزیراعلیٰ پنجاب مریم نواز شریف کی زیر صدارت “ستھرا پنجاب” منصوبے کے حوالے سے ایک اعلیٰ سطح اجلاس منعقد ہوا، جس میں منصوبے پر تفصیلی بریفنگ دی گئی۔
اجلاس کے دوران متعلقہ حکام نے صفائی کے نظام میں بہتری کے لیے متعارف کرائے گئے جدید سسٹمز پر روشنی ڈالی، جن میں وہیکل ٹرپ کاؤنٹنگ سسٹم اور وہیکل ٹریکنگ مینجمنٹ سسٹم شامل ہیں۔
اجلاس میں بتایا گیا کہ “ستھرا پنجاب” منصوبے کے تحت پہلی مرتبہ ای انوائس اور سینی ٹیشن فیس کی ای-بلنگ کا نظام بھی متعارف کرایا گیا ہے، تاکہ شفافیت اور سہولت کو یقینی بنایا جا سکے۔
وزیراعلیٰ مریم نواز شریف نے اجلاس سے خطاب کرتے ہوئے کہا کہ ستھرا پنجاب پروگرام کامیابی سے جاری ہے، تاہم چند اضلاع سے صفائی کے حوالے سے بعض شکایات موصول ہو رہی ہیں جن کا فوری ازالہ کیا جائے گا۔
اجلاس میں صوبہ بھر میں 136 نئے ویسٹ ڈسپوزل پوائنٹس قائم کرنے پر بھی اتفاق رائے ہوا۔ وزیراعلیٰ نے ہدایت کی کہ جو کنٹریکٹرز اپنی ذمہ داریاں درست انداز میں ادا نہیں کر رہے، انہیں منصوبے سے فوری طور پر نکال باہر کیا جائے۔
مریم نواز شریف نے واضح ہدایت دی کہ ہر گلی اور محلے میں صفائی کا عملہ ہر وقت موجود نظر آنا چاہیے، تاکہ عوام کو ایک صاف ستھرا ماحول فراہم کیا جا سکے۔
مزید پڑھیں: پی ٹی آئی کی حکومت مزید 6 ماہ رہتی تو ملک ڈیفالٹ کرجاتا، نائب وزیر اعظم
وزیراعلیٰ نے کہا کہ عوام کی بڑھتی ہوئی توقعات کے ساتھ ہماری کارکردگی کو بھی اسی رفتار سے بہتر بنانا ہوگا۔ سیف سٹی کیمروں کو پنجاب بھر میں صفائی کی صورتحال جانچنے کے لیے استعمال کیا جائے، تاکہ نگرانی کا نظام مزید مؤثر بنایا جا سکے۔
اجلاس میں بین الاقوامی اداروں کی دلچسپی کا بھی ذکر کیا گیا۔ بتایا گیا کہ عالمی بینک، یورپی ممالک اور دیگر ترقیاتی ادارے “ستھرا پنجاب” منصوبے میں سرمایہ کاری میں گہری دلچسپی رکھتے ہیں۔
