عالمی بینک نے پاکستان کے صوبہ پنجاب میں تعلیم کے فروغ کے لیے چار کروڑ 79 لاکھ ڈالر کی گرانٹ کی منظوری دے دی ہے۔
یہ فنڈنگ گلوبل پارٹنرشپ فار ایجوکیشن فنڈ کے تحت منظور کی گئی ہے جس کا مقصد صوبے میں تعلیمی نظام کو مزید مضبوط بنانا اور اسکول سے باہر بچوں کی دوبارہ تعلیمی نظام میں شمولیت کو یقینی بنانا ہے۔
عالمی بینک کی جانب سے جاری کردہ بیان کے مطابق اس منصوبے سے پنجاب بھر میں چالیس لاکھ سے زائد بچے مستفید ہوں گے جن میں پری پرائمری اور پرائمری سطح کے طلبا شامل ہیں۔
منصوبے کا بنیادی ہدف بچوں کی ابتدائی تعلیم میں شمولیت میں اضافہ کرنا، معذور بچوں کے لیے تعلیم کے نظام کو بہتر بنانا اور ایسے بچوں کو تعلیمی دھارے میں واپس لانا ہے جو کسی وجہ سے اسکول سے باہر ہیں۔
ورلڈ بینک کے اعلامیے کے مطابق اس منصوبے کے تحت 80 ہزار ایسے بچے جو اسکول سے باہر ہیں اور ایک لاکھ 40 ہزار معذور بچے براہ راست فائدہ اٹھائیں گے۔
اس کے ساتھ ساتھ 30 لاکھ سے زائد سرکاری اسکولوں کے طلبا اور 8 لاکھ 50 ہزار غیر رسمی تعلیمی اداروں سے وابستہ بچے بھی اس منصوبے سے مستفید ہوں گے۔
علاوہ ازیں، منصوبے کے دائرہ کار میں ایک لاکھ اساتذہ اور اسکول لیڈرز کو تربیت اور پیشہ ورانہ ترقی کے مواقع فراہم کیے جائیں گے جس کا مقصد تعلیمی معیار کو بہتر بنانا اور تعلیمی عمل کو مزید مؤثر بنانا ہے۔
عالمی بینک نے واضح کیا ہے کہ یہ منصوبہ نہ صرف تعلیمی میدان میں نظام کی اصلاحات لائے گا بلکہ صوبہ پنجاب کی پائیدار تعلیمی ترقی میں بھی ایک اہم سنگ میل ثابت ہوگا۔
واضع رہے کہ یہ اقدام حکومت پنجاب کے تعلیمی اصلاحاتی ایجنڈے سے مکمل ہم آہنگ ہے اور اس سے تعلیمی میدان میں نمایاں بہتری کی امید کی جا رہی ہے۔
