انسداد دہشت گردی عدالت فیصل آباد نے نو مئی 2023 کو رانا ثنا اللہ کے گھر پر حملے سے متعلق کیس کا فیصلہ سناتے ہوئے پاکستان تحریک انصاف کے اہم رہنماؤں سمیت 75 ملزمان کو سزائیں سنا دیں ہیں جبکہ 34 ملزمان کو بری کر دیا گیا۔
پیر کے روز انسداد دہشت گردی عدالت نے کیس کا فیصلہ سناتے ہوئے سابق وفاقی وزرا اور پی ٹی آئی کی مرکزی قیادت کو سزا سنائی۔
عدالت نے سابق قائد حزب اختلاف قومی اسمبلی عمر ایوب، سینیٹ میں سابق اپوزیشن لیڈر شبلی فراز، سابق وفاقی وزیر زرتاج گل، فرح آغا، کنول شوزب، صاحبزادہ حامد رضا، شیخ راشد شفیق، رائے مرتضیٰ اقبال اور اسماعیل سیلا سمیت 59 ملزمان کو 10،10 سال قید کی سزا سنائی۔
عدالت نے شیخ راشد جاوید اور دیگر 16 کارکنان کو 3،3 سال قید کی سزا سنائی جب کہ سابق وفاقی وزیر فواد چوہدری اور پی ٹی آئی کے وائس چیئرمین شاہ محمود قریشی کے صاحبزادے زین قریشی کو بری کر دیا گیا۔
عدالت نے یہ تمام سزائیں ملزمان کی غیر موجودگی میں سنائیں۔ مجموعی طور پر مقدمے میں 109 افراد کو نامزد کیا گیا تھا جن میں سے 75 کو سزا اور 34 کو بری کیا گیا۔
یہ مقدمہ نو مئی کے روز فیصل آباد کے سمن آباد تھانے میں درج کیا گیا تھا جس میں رانا ثنا اللہ کے گھر پر حملے، توڑ پھوڑ اور جلاؤ گھیراؤ کا الزام عائد کیا گیا تھا۔
یاد رہے کہ نو مئی 2023 کو القادر ٹرسٹ کیس میں عمران خان کی گرفتاری کے بعد ملک بھر میں احتجاجی مظاہرے پھوٹ پڑے تھے جن میں سرکاری و نجی املاک کو نقصان پہنچایا گیا۔
لاہور میں جناح ہاؤس پر حملہ کیا گیا جب کہ راولپنڈی میں جی ایچ کیو کے گیٹ کو بھی نقصان پہنچایا گیا۔ ان واقعات میں کم از کم 8 افراد ہلاک اور 290 زخمی ہوئے جب کہ ملک بھر میں 1900 سے زائد افراد کو گرفتار کیا گیا تھا۔
واضع رہے کہ انسداد دہشت گردی عدالت فیصل آباد ان چار مقدمات میں سے آخری کیس کا فیصلہ سنا چکی ہے جن کا تعلق نو مئی کے پرتشدد مظاہروں سے تھا۔
