آرمی چیف فیلڈ مارشل سید عاصم منیر نے کرتارپور میں سیلاب کی صورتحال کا جائزہ لیا اور اس دوران سکھ کمیونٹی کی تمام عبادت گاہوں کی جلد مکمل بحالی کی یقین دہانی کروائی۔
پاک فوج کے شعبہ تعلقات عامہ ‘آئی ایس پی آر’ کے مطابق فیلڈ مارشل سید عاصم منیر نے سیلاب سے متاثرہ علاقوں سیالکوٹ، شکرگڑھ، نارووال اور کرتارپور کا دورہ کیا۔
سکھ کمیونٹی نے سیلاب متاثرہ دربار صاحب کرتارپور میں بروقت امدادی کارروائیوں پر فیلڈ مارشل سید عاصم منیر کا شکریہ ادا کیا اور آرمی چیف کے کرتارپور دورے اور بروقت امدادی کارروائیوں کی تعریف کی ہے۔
سکھ رہنما رمیش سنگھ اروڑہ کا کہنا تھا کہ سیلاب کے دوران بروقت امدادی کارروائیوں پر فیلڈ مارشل سید عاصم منیر کا تہہ دل سے شکریہ ادا کرتے ہیں جبکہ ہم سول انتظامیہ کا بھی ساتھ دینے پر شکریہ ادا کرتے ہیں۔
انہوں نے مزید کہا فیلڈ مارشل نے ہمیں کہا تھا کہ جہاں ضرورت ہوگی ہمارے ہیلی کاپٹر موجود ہوں گے اس پر بھی ہم ان کے شکرگزار ہیں پاک فوج آخری شخص کی بحفاظت منتقلی تک ساتھ کھڑی رہی۔
رمیش سنگھ نے یہ بھی کہا پاکستان اور سکھوں کا رشتہ ہمیشہ قائم و دائم رہے گا پاکستان ہماری دھرتی اور ہماری جان ہے دنیا بھر کے سکھ آکر کہتے ہیں پاکستان اقلیتوں کے لیے محفوظ ترین ملک ہے۔ سکھ یاتری پاکستان سے جاتے ہیں تو آنکھوں میں خوشی کے آنسو ہوتے ہیں۔
انہوں نے مزید کہا کہ فیلڈ مارشل سید عاصم منیر کے ساتھ بیٹھنے سے پوری دنیا میں سکھ برادری کا سر فخر سے بلند ہوگیا دنیا کو جب پتا چلے گا کہ فیلڈ مارشل عاصم منیر نے خود کرتارپور کا دورہ کیا تو سکھوں کا مان مزید بڑھے گا۔
مزید براں فیلڈ مارشل عاصم منیر کا شکریہ ادا کرتے ہوئے دیگر سکھ رہنماؤں کا کہنا تھا آرمی چیف نے جو سکھ کمیونٹی کا مان بڑھایا اس پر پوری دنیا کے سکھوں کی طرف سے تہہ دل سے شکریہ ادا کرتے ہیں۔
سیلاب کے بعد 24 گھنٹے میں جو آپ نے کیا اس کے لیے ہمارے پاس الفاظ نہیں ہیں کرتاپور صاحب کے لیے آپ نے جو کیا اس پر بھرپور شکر گزار ہیں۔
سکھ رہنماؤں نے کہا کہ دنیا بھر کے سکھوں کا سر پاکستان کی طرف عقیدت و احترام کے ساتھ جھکتا ہے دنیا بھر کے سکھوں کا پیار اور ہمدردیاں پاکستان کے ساتھ ہیں۔
انہوں نے یہ بھی کہا کہ پوری دنیا کے سکھ آپ کے مشکور ہیں پاکستان ہمارے لیے حقیقی طور پر جنت ہے پاک فوج سیلاب جیسی قدرتی آفت میں پاکستان کے عوام کی ہر ممکن مدد کے لیے ہمیشہ پیش پیش ہے۔
واضع رہے کہ فیلڈ مارشل سید عاصم منیر نے سکھ کمیونٹی سے خطاب کرتے ہوئے سکھ کمیونٹی کی تمام عبادت گاہوں کی جلد مکمل بحالی کی یقین دہانی کروائی۔
