کینیڈا نے پاکستان سمیت دنیا بھر کے طالب علموں سے ‘کینیڈا گریجویٹ ریسرچ سکالرشپ 2026’ کے لیے درخواستیں وصول کرنا شروع کر دی ہیں۔
کینیڈین حکومت کی جانب سے جاری کردہ اطلاعات کے مطابق سکالرشپ حاصل کرنے والے غیر ملکی طلبہ کو مالی مدد کے طور پر سالانہ 40 ہزار کینیڈین ڈالر دیے جائیں گے۔
یہ سکالرشپ کینیڈا کے کسی بھی تسلیم شدہ تعلیمی ادارے میں پی ایچ ڈی پروگرام میں زیر تعلیم غیر ملکی طلبہ کے لیے دستیاب ہے۔
درخواستوں کی آخری تاریخ 17 اکتوبر 2025 ہے اور یہ سکالرشپ صرف پی ایچ ڈی سطح کے پروگراموں کے لیے ہے۔
کینیڈا کی حکومت کے مطابق، سکالرشپ کا مقصد تحقیق جدت اور تخلیقی سوچ کو فروغ دینے کے لیے نئے اور باصلاحیت محققین کی سرپرستی کرنا ہے۔
منتخب امیدواروں کو سالانہ 40 ہزار کینیڈین ڈالر کی مالی امداد دی جائے گی، جو زیادہ سے زیادہ تین سال تک جاری رہے گی۔
سکالرشپ حاصل کرنے کے لیے ضروری ہے کہ غیر ملکی طلبہ نے کینیڈا کی کسی تسلیم شدہ یونیورسٹی میں پی ایچ ڈی پروگرام میں داخلہ لے رکھا ہو اور درخواست دہندہ نے 31 دسمبر 2025 تک پی ایچ ڈی کی 36 ماہ کی تعلیم مکمل نہ کی ہو۔
علاوہ ازیں مشترکہ پروگرام جیسے (ایم ڈی/پی ایچ ڈی، ایم اے/پی ایچ ڈی) کے طلبہ بھی اہل ہیں بشرطیکہ پروگرام میں تحقیقی تھیسس شامل ہو۔
واضع رہے کہ درخواست دینے کے لیے، درخواست دہندگان کو متعلقہ کینیڈین ادارے کے ذریعے درخواست دینا ہوگی۔
اس حوالے سے کینیڈین حکام کا کہنا ہے کہ اس سکالرشپ کے ذریعے عالمی سطح پر تحقیق اور علم کے شعبے میں مزید بہتری لانے کی کوشش کی جا رہی ہے اور امید کی جاتی ہے کہ اس سے نئے محققین کو فائدہ پہنچے گا۔
