حافظ آباد میں سابق وفاقی وزیر لیاقت عباس بھٹی کو مبینہ طور پر گلا گھونٹ کر قتل کردیا گیا۔ ان کی لاش کسوکی بائی پاس کے قریب واقع رہائش گاہ کے ایک کمرے سے برآمد ہوئی، جبکہ پولیس نے قتل اور ڈکیتی کے الزام میں ان کے چار ذاتی سیکیورٹی گارڈز سمیت 10 سے زائد افراد کے خلاف مقدمہ درج کرکے ملزمان کی گرفتاری کے لیے کارروائی شروع کردی ہے۔
ڈی پی او حافظ آباد فواد احمد کے مطابق سابق وفاقی وزیر لیاقت عباس بھٹی کی لاش ان کے کمرے سے ملی تھی۔ ابتدائی معائنے کے دوران مقتول کے گلے پر رسی سے گلا گھونٹنے کے واضح نشانات پائے گئے، جس سے بظاہر یہ واقعہ قتل کا معلوم ہوتا ہے۔ پولیس نے واقعے کی مختلف پہلوؤں سے تحقیقات شروع کردی ہیں۔
پولیس کے مطابق مقتول کے بھتیجے اور رکن پنجاب اسمبلی ضمیر الحسن بھٹی کی مدعیت میں تھانہ سٹی حافظ آباد میں قتل اور ڈکیتی کا مقدمہ درج کیا گیا ہے۔ ایف آئی آر میں 10 سے زائد افراد کو نامزد کیا گیا ہے، جن میں سابق وفاقی وزیر کے چار ذاتی سیکیورٹی گارڈز بھی شامل ہیں۔
درج مقدمے کے متن کے مطابق ملزمان نے مبینہ طور پر لیاقت عباس بھٹی کو گلا دبا کر قتل کیا اور واردات کے بعد گھر سے قیمتی سامان لے کر فرار ہوگئے۔ ایف آئی آر میں الزام عائد کیا گیا ہے کہ ملزمان 50 تولے سونے کے زیورات، 20 لاکھ روپے نقدی، اسلحہ اور مقتول کی تین قیمتی گاڑیاں بھی اپنے ساتھ لے گئے۔
واقعے کے بعد پولیس نے ملزمان کی گرفتاری کے لیے خصوصی ٹیمیں تشکیل دے دی ہیں۔ ڈی پی او فواد احمد کا کہنا ہے کہ پولیس کی ٹیمیں مختلف پہلوؤں پر کام کر رہی ہیں اور واقعے میں ملوث افراد کو گرفتار کرنے کے لیے کوششیں جاری ہیں۔
پولیس اس بات کا بھی جائزہ لے رہی ہے کہ واردات میں مبینہ طور پر گھر کے اندر موجود افراد اور ذاتی سیکیورٹی گارڈز کا کیا کردار تھا۔ تاہم واقعے کی اصل وجوہات اور ملزمان کے ملوث ہونے سے متعلق حتمی حقائق تفتیش مکمل ہونے کے بعد سامنے آئیں گے۔
واضح رہے کہ لیاقت عباس بھٹی کا شمار حافظ آباد کی اہم سیاسی شخصیات میں ہوتا تھا۔ وہ اپنے سیاسی کیریئر کے دوران دو مرتبہ رکن قومی اسمبلی اور ایک مرتبہ رکن پنجاب اسمبلی منتخب ہوئے تھے۔ وہ سابق رکن قومی اسمبلی مہدی حسن بھٹی کے بھائی جبکہ رکن اسمبلی انیقہ مہدی کے چچا تھے۔
سابق وفاقی وزیر کے قتل کی خبر سامنے آنے کے بعد علاقے میں تشویش پائی جاتی ہے، جبکہ پولیس نے واقعے کی تحقیقات اور نامزد ملزمان کی گرفتاری کے لیے کارروائیاں تیز کردی ہیں۔







