وزیراعظم شہباز شریف نے لیفٹیننٹ جنرل (ر) نعمان محمود کو مکہ دفاعی اتحاد کے سیکرٹری جنرل کا منصب سنبھالنے پر مبارک باد دی اور ان کے لیے نیک خواہشات کا اظہار کیا۔ ملاقات کے دوران وزیراعظم نے اس امید کا اظہار کیا کہ ان کی قیادت میں اتحاد کے مقاصد کے حصول اور رکن ممالک کے درمیان دفاعی و تزویراتی تعاون کو مضبوط بنانے میں مدد ملے گی۔
وزیراعظم شہباز شریف نے مکہ امن معاہدے کو خطے میں امن، اتحاد اور استحکام کے فروغ کی جانب ایک اہم تاریخی سنگِ میل قرار دیا، خطے کو درپیش سلامتی کے چیلنجز سے نمٹنے کے لیے باہمی اعتماد، مشترکہ حکمت عملی اور برادر ممالک کے درمیان قریبی تعاون ناگزیر ہے۔
وزیراعظم نے اس موقع پر پاکستان اور سعودی عرب کے دیرینہ برادرانہ تعلقات کا حوالہ دیتے ہوئے کہا کہ پاکستان اپنے برادر ملک سعودی عرب کی خودمختاری، دفاع اور علاقائی سلامتی کے تحفظ کے لیے اس کے ساتھ کھڑا ہے، پاکستان سعودی عرب کے اپنے دفاع کے جائز حق کی مکمل حمایت کرتا ہے اور اس کی خودمختاری اور علاقائی سالمیت کے تحفظ کے لیے اپنے غیر متزلزل عزم کا اعادہ کرتا ہے۔
ملاقات کے دوران مکہ دفاعی اتحاد کے سیکرٹری جنرل لیفٹیننٹ جنرل (ر) نعمان محمود نے وزیراعظم کو معاہدے کے فریم ورک کے تحت دفاعی اور تزویراتی تعاون کو فروغ دینے کے لیے تیار کی گئی جامع حکمت عملی سے آگاہ کیا۔ اس موقع پر اتحاد کے مقاصد، باہمی رابطوں کو مؤثر بنانے اور رکن ممالک کے درمیان تعاون کو مزید مستحکم کرنے سے متعلق امور پر بھی گفتگو کی گئی۔
دونوں رہنماؤں نے اس بات پر اتفاق کیا کہ خطے میں پائیدار امن اور استحکام کے لیے مشترکہ کوششیں جاری رکھنا ضروری ہے۔ ملاقات میں اس عزم کا اظہار بھی کیا گیا کہ دفاعی تعاون اور باہمی اشتراک کو مزید مضبوط بنا کر علاقائی سلامتی سے متعلق مشترکہ اہداف کے حصول کے لیے کام کیا جائے گا۔
وزیراعظم شہباز شریف نے پاکستان اور سعودی عرب کے درمیان قریبی تعلقات کی اہمیت اجاگر کرتے ہوئے کہا کہ دونوں ممالک کے روابط مشترکہ مفادات، باہمی اعتماد اور دیرینہ برادرانہ تعلقات پر قائم ہیں۔ مکہ دفاعی معاہدے کے تناظر میں ان تعلقات کو مزید آگے بڑھانا اور خطے میں امن و استحکام کے لیے تعاون جاری رکھنا دونوں ممالک کی ترجیحات میں شامل ہے۔
