اپنے پیغام میں روسی صدر نے پاکستانی قیادت اور عوام کو یومِ آزادی کی مبارکباد پیش کرتے ہوئے پاکستان کے لیے امن، خوشحالی اور نیک خواہشات کا اظہار کیا۔
ولادیمیر پیوٹن نے کہا کہ روس اور پاکستان کے تعلقات کامیابی کے ساتھ فروغ پا رہے ہیں اور دونوں ممالک مختلف شعبوں میں مربوط انداز میں آگے بڑھ رہے ہیں۔
انہوں نے کہا کہ دونوں ممالک کے درمیان سیاسی، تجارتی، اقتصادی اور انسانی ہمدردی سمیت مختلف شعبوں میں نتیجہ خیز تعاون جاری ہے۔
روسی صدر کے مطابق روس اور پاکستان کے درمیان اہم علاقائی اور عالمی امور پر بھی باہمی تعاون جاری ہے، جب کہ دونوں ممالک کی شراکت داری خطے میں استحکام کے لیے انتہائی اہمیت رکھتی ہے۔
ولادیمیر پیوٹن نے اس عزم کا اعادہ کیا کہ روس اور پاکستان اپنے عوام کے باہمی مفاد میں دوطرفہ شراکت داری کے تمام شعبوں کو مزید مضبوط بنائیں گے۔
انہوں نے کہا کہ دونوں ممالک کے درمیان بڑھتا ہوا تعاون طویل مدتی تعلقات کو مزید مستحکم کرنے میں کلیدی کردار ادا کرے گا۔
