برطانوی ہائی کمیشن کے ترجمان کا اس حوالے سے مزید کہنا تھا کہ برطانوی قوانین کی خلاف ورزی سے متعلق کوئی بھی مواد پولیس کے پاس جائے تو وہ اس کا جائزہ لے کر مجرمانہ تحقیقات شروع کر سکتی ہے۔

اس سے قبل دفترِ خارجہ کے ترجمان نے تصدیق کی تھی کہ پاکستانی عسکری قیادت کے خلاف اشتعال انگیز تقاریر کے معاملے پر برطانوی شہر بریڈ فورڈ میں پاکستانی قونصل خانے کے باہر احتجاج کے بعد برطانیہ کے قائم مقام ہائی کمشنر کو ڈیمارش جاری کیا گیا ہے۔

ترجمان طاہر اندرابی کے مطابق ڈپٹی ہیڈ آف مشن میٹ کینل کو دفترِ خارجہ طلب کر کے واقعے پر شدید احتجاج ریکارڈ کرایا گیا۔

ڈیمارش میں برطانوی حکام پر زور دیا گیا ہے کہ وہ اپنی سرزمین پر پاکستانی قیادت کو دی جانے والی دھمکیوں کا نوٹس لیں اور اپنی زمین کو پاکستان کو غیر مستحکم کرنے کے لیے استعمال نہ ہونے دیں۔

یہ بھی واضح رہے کہ حکومتِ پاکستان نے برطانوی حکام کو ایک خط لکھ کر بریڈ فورڈ کے احتجاج کے دوران پاکستانی فوجی قیادت کے خلاف مبینہ دھمکیوں پر کارروائی کا مطالبہ کیا تھا۔

وزیرِ مملکت برائے داخلہ طلال چوہدری اور وزیرِ مملکت برائے خزانہ بلال اظہر کیانی نے اس خط کی تصدیق بھی کی ہے۔

ان کا کہنا تھا کہ خط میں ایک خاتون کی جانب سے دئیے گئے اشتعال انگیز بیانات پر مبنی ویڈیو کا حوالہ بھی شامل ہے، جس میں وہ مبینہ طور پر پاکستان کی فوجی قیادت کے خلاف انتہائی سنگین زبان استعمال کرتی دکھائی دیتی ہیں۔

یاد رہے کہ 23 دسمبر 2025 کو پی ٹی آئی برطانیہ کے ایک آفیشل ایکس (سابق ٹوئٹر) اکاؤنٹ سے ایک ویڈیو شیئر کی گئی تھی، جس میں چند مظاہرین کو پاکستان کے فیلڈ مارشل کے خلاف مبینہ طور پر بم دھماکے کے ذریعے قتل کی دھمکی دیتے ہوئے دیکھا جا سکتا ہے، جب کہ ویڈیو میں موجود خاتون نے انتہائی اشتعال انگیز زبان استعمال کی۔