جنوبی پنجاب کے مختلف اضلاع میں گرج چمک کے دوران آسمانی بجلی گرنے سے چار افراد جاں بحق اور متعدد زخمی ہو گئے۔
صوبائی ڈیزاسٹر مینجمنٹ اتھارٹی کے ترجمان کے مطابق ہلاکتیں راجن پور اور بہاولپور اضلاع میں ہوئیں۔ پورے علاقے میں گرج چمک کے ساتھ موسلا دھار بارش ہوئی۔
ڈائریکٹر جنرل پی ڈی ایم اے عرفان علی کاٹھیا نے متاثرہ اضلاع کے ڈپٹی کمشنرز سے رابطہ کیا اور انہیں ہدایت کی کہ زخمیوں کو بہترین طبی امداد کی فراہمی کو یقینی بنایا جائے۔
عرفان علی کاٹھیا نے کہا کہ ہمیں جانوں کے ضیاع پر بہت دکھ ہوا ہے۔ مرنے والوں کے اہل خانہ کو مالی امداد فراہم کی جائے گی،قدرتی آفات سے صرف مشترکہ کوششوں اور تعاون سے ہی نمٹا جا سکتا ہے۔
انہوں نے عوام پر زور دیا کہ وہ خراب موسمی حالات میں احتیاطی تدابیر اختیار کریں، لوگ محفوظ مقامات پر رہیں اور طوفان کے دوران کھلے آسمان تلے رہنے سے گریز کریں۔
پی ڈی ایم اے نےصورتحال کی نگرانی جاری رکھے ہوئے ہے اور بروقت ردعمل اور امدادی کارروائیوں کو یقینی بنانے کے لیے مقامی حکام کے ساتھ رابطہ قائم کر رہا ہے۔
